STK TA LOGRA YEGA NA UN AKUERDO TOKANTE AREGLO DI ABANDONO “AFVLOEINGSREGELELING” KU REFINERIA DI KORSOU

STK TA LOGRA YEGA NA UN AKUERDO TOKANTE AREGLO DI ABANDONO “AFVLOEINGSREGELELING” KU REFINERIA DI KORSOU

Willemstad 7 di oktober 2019

Sindikato di Trahadonan di Kòrsou (STK), a logra yega na un akuerdo ku Refineria di Kòrsou 

( RdK), e kompania madre di CRU,  tokante di un areglo di abandono pa trahadonan di CRU.

E asina yamá “afvloeiingsregeling” ta un areglo akordá ku ta determiná bou di ki kondishon e empleadonan ta terminá nan empleo na CRU, den kaso di terminashon di empleo masal òf kolektivo. 

 

Komo sindikato responsabel STK a lucha for di 2017 pa yega na un areglo asina, sin resultado satisfaktorio. Na desember 2018 a re-inisiá e proseso di negosashon ku e gerensia aktual di RdK, komo ku a mira ku tempu ta pèrta i trahadonan a bira desesperá. Legalmente no tabatin un areglo eksistente pa terminashon di empleo masal ku no ta solamente lokual ku lei ta preskribí komo e areglo di abandono. Pa STK su miembronan esaki no tabata apseptabel i miembronan a duna direktiva di STK e mandato pa negoshá un areglo mas apseptabel. Despues di kasi un aña di negosashon intenso, STK ta satisfecho di por a yega na un akuerdo hustifika pa su miembronan. E akuerdo ta produkto di esfuerso intensivo, kaminda STK a demonstrá su profeshonalismo, persistensia, madures i kordura pa yega na un areglo benefisioso ku ta aportá na pas laboral pa Kòrsou.

E akuerdo aki entre e dunadó di trabou i e representashon sindikal ta bai forma parti integral di e kontrato kolektivo eksistente kaba.  Ku e esfuersonan andando pa yega na un operador nobo pa refineria, CRU i Bullenbaai, partidonan ta premirá ku en todo kaso por bini un kambio di dunadó di trabou ma komienso di aña ku chens ku no tur trahadó ta of kier forma parti di e konstelashon nobo. Esaki lo efektuá e kondishonnan di terminashon di empleo ku CRU den forma kolektivo pa kual e trahadó aktual di CRU por konta ku un kompensashon ku ta surpasá lokual lei ta stipula teniendo tambe kuenta ku anjanan di empleo di kada trahado segun e areglo. STK ta satisfecho ku e akuerdo logra ku RdK, pa’asina posishoná su mes habri pa negoshá liber ku futuro partner strategiko na bienestar di su miembronan.

 

STK ta siguí hopi di aserka e desaroyonan pa yega na un futuro partner strategiko pa nos fasilidatnan petrolero inkluso CRU.  Den esaki STK lo sigui, manera semper ela hasi, sali na un forma madurá i dirigí riba logronan tangibil na bienester di e miembronan di STK.

Ku reto nan nos dilanti, nos mester posishoná nos mes firme pa kapitalisá riba mas benefisio pa oportunidat ku presentá den futuro. 

Na nomber di Sindikato di Trahadornan di Korsou (S.T.K.)

Adriëla Job-Dirksz, Presidente

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: