Parlamentario Curtley Obispo: Ta 35 aña ta bai dura pa kobra e 700 mion florin ku Pais Kòrsou tin riba kaya?

Ta 35 aña ta bai dura pa kobra e 700 mion florin ku Pais Kòrsou tin riba kaya?

Parlamentario Curtley Obispo den e Reunion Publiko di Parlamento di Kòrsou di dia 11 òktober 2019, atrobe a toka 3 tema masha importante pa loke ta trata futuro di Finansa Publiko di nos Pais Kòrsou. Ta trata di: (1) solidaridat di kontribushon di belasting na tempu di tur kontribuyentenan, (2) e défisit operashonal riba strepi di Kuenta Koriente di Pais Kòrsou i (3) e mas di 700 mion florin ku Pais Kòrsou tin riba kaya pa kobra segun leinan fiskal di Pais Kòrsou.

Parlamentario Curtley Obispo atrobe a ripití ku mester tin 100% di solidaridat di kontribushon di belasting na tempu di tur kontribuyentenan.  Si kontribuyentenan no kontribuí na tempu ta problema so ta bai tin pa: (1) mantené e Presupuestonan di Kuenta Koriente den balansa durante ehekushon i (2) garantisá pagonan di gastunan kolektivo na tempu di Pais Kòrsou. Ta p’esei e la bolbe ripití: tur i tur kontribuyente di belasting mester kumpli i paga nan kontribushon di belasting na tempu na Kaha di Pais Kòrsou segun leinan di Pais Kòrsou. Pa asina garantisá Presupuestonan di Kuenta Koriente di Pais Kòrsou strukturalmente ta den balansa durante fase di ehekushon. Tur esaki na bienestar i progreso di nos Pais Kòrsou!

Parlamentario Curtley Obispo tambe atrobe a mustra ku te awe no a resolvé strukturalmente e défisitnan operashonal riba strepi di Kuenta Koriente di Pais Kòrsou. Défisitnan operashonal riba strepi di Kuenta Koriente di Pais Kòrsou kual ta suma un total di 739.4 mion florin for di 10 òktober 2010 te ku 31 desèmber 2019. E défisit operashonal riba strepi di Kuenta Koriente di Pais Kòrsou ta igual na e resultadonan di Kuenta Koriente di Pais Kòrsou over di e periodo ariba menshoná, kitando e lapinan di entradanan pa un total di 466.3 mion florin di: (a) BRK, (b) vrijval di voorzieningen i reserves i (c) dividendo di kompanianan anónimo di Pais Kòrsou.  Tambe ta di bon di kòrda ku e lapinan aki strukturalmente a baha durante e periodo ariba menshoná.

Pa loke ta trata e tema di “compliance achterstallige belastingen”, parlamentario Curtley Obispo a trese entre otro lo siguiente pa dilanti. Pais Kòrsou tin mas ku 700 mion florin riba kaya di kontribuyentenan di belasting ku no a kontribuí na tempu ku Kaha di Pais Kòrsou. Minister di Finansa, señor Kenneth Gijsbertha, a indiká un par di luna pasa den un reunion di Parlamento di Kòrsou ku tin mas ku 700 mion florin riba kaya. Den e Akuerdo di Kresementu Kòrsou ta opta pa kobra 20 mion florin den aña 2019 di e mas di 700 mion di belasting atrasá. Pregunta: kuantu di e 20 mion florin a logra di kobra?.  Si a akordá pa kobra 20 mion florin den aña 2019 di e mas di 700 mion florin na belasting atrasá riba kaya di Pais Kòrsou. Pregunta kritiko ta bira: e plan di kobransa di belasting atrasá di Minister Finansa i Gobièrnu di Kòrsou no ta pa kobra e 700 mion florin den 35 aña tòch?. Kuantu di e 700 mion florin, Minister di Finansa i Gobièrnu di Kòrsou tin planeá pa kobra den aña 2020 segun leinan fiskal di nos Pais Kòrsou?. Pa asina enbèrdat: (a) garantisá solidaridat di kontribushon struktural di belasting di tur i tur kontribuyentenan i (b) strukturalmente solushoná, atendé i kombatí den futuro e défisit operashonal riba strepi di Kuenta Koriente nan di Pais Kòrsou? 

Tambe parlamentario Curtley Obispo den su ròl di kontròl parlamentario a pidi Minister di Finansa i Gobièrnu di Kòrsou un plan konkreto kon ta bai kobra e 700 mion florin ku Pais Kòrsou tin riba kaya segun leinan fiskal di Pais Kòrsou.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: