Parlamentario Curtley Obispo: Preguntanan na Gobièrnu di Kòrsou riba ehekushon di Akuerdo di Kresementu Kòrsou i ahustenan entrante Sèptèmber 2019.
Preguntanan na Gobièrnu di Kòrsou riba ehekushon di Akuerdo di Kresementu Kòrsou i ahustenan entrante Sèptèmber 2019.
Parlamentario Curtley Obispo den e Reunion Públiko di Parlamento di Kòrsou di dia 11 òktober 2019, a hasi diferente preguntanan pa trese mas klaridat, pa mas informashon i tambe pa Parlamento di Kòrsou risibí un statusupdate pa loke ta trata: (1) e Akuerdo di Kresementu Kòrsou, e tema di belasting i (2) e ahustenan entrante sèptèmber 2019 pa loke ta trata afvalstoffenbelasting i tambe omzetbelasting na importashon.
Ta trata di e siguiente preguntanan di Akuerdo di Kresementu Kòrsou pa loke ta trata e tema di belasting: (1) Kon leu ta ku revishon di e sistema di belasting kual mester drenta na vigor den fase entrante 1 yanüari 2020?; (2) Gobièrnu di Kòrsou ta bai logra entrega Parlamento di Kòrsou no mas tarda 31 desèmber 2019, e plan pa un sistema di belasting revisá pa Pais Kòrsou? Esaki no mester ta promé ku tratamentu di Presupuesto 2020 di Pais Kòrsou?; (3) Kon konkretamente Gobièrnu di Kòrsou lo bai reforsá e instansianan di kobransa?; (4) Ki dia a start ku e plan di akshon di revishon di belasting (“Belastingherziening”)? Kon leu ta ku e plan aki awe dia 11 òktober 2019? Kiko tabata e resultadonan konkreto di e plan te na e momento aki?; (5) Kon leu ta ku revishon di e leinan di belasting internashonal pa evitá ku Pais Kòrsou su sektor finansiero no kai riba un lista pretu?. Den e kuadro aki tin un Proyekto di Lei di Gobièrnu di Kòrsou na kaminda pa Parlamento di Kòrsou? E Proyekto di Lei a yega na tempu na Parlamento di Kòrsou trata esaki?
Preguntanan den kuadro di garantisá solidaridat di kontribushon di afvalstoffenbelasting: (6) Kon leu ta ku traspaso di Aqualectra pa Selikor di e fakturashon di afvalstoffenbelasting. Tin un plan di akshon pa esaki? (7) Kon leu ta ku traspaso di datonan di Aqualectra pa Ontvanger di Kòrsou pa asina den e “debiteurenoverzichten” di Ontvanger di Kòrsou por tin e montantenan pa asina por kobra kontribuyentenan e afvalstoffenbelasting atrasá?.
Pregunta den kuadro di omzetbelasting na importashon: (8) Kon leu ta ku kontròlnan pa start i check ku si ta aplikando e tarifa korekto di omzetbelasting den nan preisnan di benta na importashon. Kontròlnan pa check si no ta hinka e 9% kompleto den nan preisnan sin tene kuenta ku e “aftrekrecht”?.
