ko: Selikor ta otorgá di dos edishon di Gladys van Dal Mc Kenzie Award na Hofi Cas Cora

Netamente riba fecha natal di sra. Gladys van Dal Mc Kenzie, Selikor NV a anunsiá e ganadó di e di dos edishon di e prestigioso premio ku ta karga su nòmber. Di e 5 nominadonan pa e Gladys Van Dal Mc Kenzie Award ta Hofi Cas Cora a bai ku e premio máksimo.

 

E di tres siman di luna di òktober tradishonalmente ta selebrá siman di medioambiente aki na Kòrsou. For di aña pasá Selikor a bini na e idea pa den siman di medioambiente duna honor na sra. Gladys van Dal di felis memoria, ku tabata un pilar den e lucha pa un medioambiente duradero. A krea un premio ku ta karga su nòmber ku e meta pa stimulá i motivá organisashonnan pa tene kuenta ku preservashon di nos medioambiente den nan operashon. Di e forma akí Selikor NV kier a duna rekonosementu póstumo tur aña di nobo na un di nos baluartenan riba tereno di medioambiente.

 

Djabièrnè 18 di òktober, den kuadro di klousura di e siman di medioambiente 2019, Selikor NV a hasi entrega di e di dos edishon di e Gladys Van Dal Mc Kenzie Award. Remarkabel ta ku riba e fecha akí Gladys lo a kumpli 90 aña si e tabata na bida. 

 

Pa e di dos edishon di e premio a skohe 5 organisashon ku a demostrá di ta riba un bon kaminda pa loke ta trata aspektonan ku e premio ta para p’e. E komishon di selekshon a skohe e siguiente nominadonan pa risibí e di dos Gladys van Dal Mc Kenzie Award: D-Bottle Curaçao, JCI United Citizens of Curaçao, Hofi Cas Cora, Green Phenix i Fresh Habits. E ganadó a resulta di ta Hofi Cas Cora.

 

Selikor ta sumamente honrá di un bes por a otorgá e premio akí i asina rekordá un persona hopi spesial, ku manera e mes tabata yama su mes: e madrina di Selikor. Un pabien ta bai na tur e nominadonan i tambe Hofi Cas Cora komo ganadó.