MONUMENTENBUREAU A FIRMA ENTREGA DI E PARTI MONUMENTAL DI E EDIFICIO DI BESTUURSKANTOOR

MONUMENTENBUREAU A FIRMA ENTREGA DI E PARTI MONUMENTAL DI E EDIFICIO DI BESTUURSKANTOOR

 

ORANJESTAD –  Den un acto formal, riba 16 di oktober 2019 a firma e entrega di e parti monumental di e edificio di Bestuurskantoor. Esaki a wordo firma dor di Minister Presidente, sra. Mr. Evelyna Wever- Croes, Directora di Momentenbureau, sra.ing. Yvonne Webb-Kock y director di Van Kessel Havenbouw, sr. Jan van Kessel.

 

Edificio monumental

E edificio di Gobierno a wordo inscribi den e Registro di Monumento  riba 1 di juni di aña 2010. Na aña 14 maart 2017 e edificio aki a ricibi su “Seyo di Monumento Proteha”. E edificio ta hopi importante pa nos historia y ta categorisa como un monumento di categoría A, segun e actual criterianan di Monumentenhandboek di Aruba.y ta importante pa Aruba pa:

  • Importancia di e edificio como expresion di un desaroyo social y político;
  • Laso specifico cu e historia di construccion durante di e Segunda Guera Mundial;
  • Importancia di e edificio como expresion unico di desaroyo geografico banda di e costa y un desaroyo administrativo;
  • Importancia di e edificio como un expresion di un desaroyo tipologico di arkitectura climatologico di DOW y pasadia pa militarnan;
  • Balor etnologico pa e desaroyo di e país Aruba;
  • Balor pa e historia di arquitectura y technica di construcción;
  • Su balor halto di calidad estetica di e diseño;
  • Importancia di e detaye di e porta y bentana, plafon y dak cu ta pasa e muraya;
  • Significacion di e obheto como parti esencial di un totalidad grandi cu ta di importancia nacional  cultural-historico, arkitectura-historico y desaroyo urbano;
  • Importancia unico pa unda e edificio ta situa na L.G. Smith Boulevard cu e cercania di e waf y su relacionnan cu mas edificionan historico;
  • Importancia di e edificio pa aspecto di aparencia di Oranjestad;
  • Importancia di e edificio den relacion cu autenticidad visual cu e contexto urbano;
  • Balor di e obheto pa ta único den su arkitectura-historico y scarcedad como lugar militar y edificionan di Gobierno.

 

Restauracion

Na fin di aña di 2017 a dicidi di prepara e restauracion di e edificio monumental aki. Despues di un destaho publico y trabaonan a wordo otorga na Van Kessel & Havenbouw. E proyecto a wordo prepara dor di DOW pa e hala A cu B y Monumentenbureau a prepara e hala Cu ta e parti situa na L. G. Smith Boulevard. E restauraucion a wordo ehecuta riba un nivel hopi halto y cumpliendo cu e reglanan pa edificionan monumental. 

Asina a habri e balkonnan dilanti bek, a trece e fachada di entrada bek, tur e porta y ventana na hala C ta den nan estado original. Tambe a trece e edificio monumental bek den su color original. Partinan semper den edificionan historico cu ta keda un reto ta trece coriente, airco, camaranan cu no por ta visibel riba e fachadanan. Tin parti cu a polish e tegelanan bieuw y trece linóleum cu tabata poni riba e vloernan. Tur esaki combina cu partinan moderna pa ubica e destinación di por eherce e trabao diario y importante pa goberna. 

 

Gradicimento

Monumentenbureau ta gradici su Minister di Cultura sra. Xiomara Ruiz-Maduro, Minister di Infrastructura, sr. Otmar Oduber y e conseho di Minister pa e confianza ricibi pa restaura otro edificio Monumental.

 

Monumentenbureau

Monumentenbureau ta e instancia gubernamental encarga cu e ordenanza di Monumento, ta encarga cu tur asuntonan general di monumento, ta prepara y desiña y traha e descripcion pa destaho pa restauracion di monumento. Alabes e instancia ta supervisa y maneha restauracionnan, ta controla y duna permiso di monumento. Monumentenbureau ta encarga tambe cu tur asuntonan tecnico di monumento, ta duna informacion y educa y ta e instituto di conocimento di monumento di Aruba. E departamento gubernamental aki ta ekipa cu e expertonan di monumento di Aruba. 

This site uses Akismet to reduce spam. Learn how your comment data is processed.

error: Content is protected !!
%d bloggers like this: