Parlamentario Curtley Obispo: Preguntanan Presupuesto 2020 pa loke ta trata e kapítulonan di Organonan di Estado i e Ministerio di Asuntunan General.

Preguntanan Presupuesto 2020 pa loke ta trata e kapítulonan di Organonan di Estado i e Ministerio di Asuntunan General.

Durante e promé dia di tratamentu di Presupuesto 2020 di Pais Kòrsou, parlamentario Curtley Obispo a base di su análisis di sifra a konsentrá su preguntanan riba entradanan i gastunan di Kuenta Koriente di Pais Kòrsou pa loke ta trata e kapítulonan di Organonan di Estado i e Ministerio di Asuntunan General.

Pa loke ta Organonan di Estado e preguntanan di parlamentario Curtley Obispo tabata dirigí riba: (1) pa sa e motibunan di e subida di 0.5 mion florin den entrada di Korte Komun di Hustisia (aña 2020 kompará ku aña 2018); (2) pa sa ku si tin riesgonan pa realisá e entrada presupuestá aña 2020 di 1.7 mion florin pa loke ta trata Korte Komun di Hustisia, (3) pa sa e motibunan dikon gastunan di Korte Komun di Hustisia a subi ku 1.2 mion florin (aña 2020 kompará ku aña 2019), (4) pa sa e motibunan dikon un bahada di 1.3 mion florin den entrada (aña 2020 kompará ku aña 2018) pa loke ta trata Warda Kosta; (5) pa sa dikon e gastunan di Konseho di Mantenshon di Lei a subi ku 0.4 mion florin (aña 2020 kompará ku aña 2019). 

Pa loke ta e Ministerio di Asuntunan General e preguntanan di parlamentario Curtley Obispo tabata dirigí riba: (1) pa sa e motibunan dikon un bahada di 0.5 mion florin den entrada pa loke ta Gabinete di Minister di Asuntunan General (aña 2020 kompará ku aña 2018); (2) pa sa kiko e entrada di 2.2 mion florin presupuestá pa aña 2020 ta konsistí di dje pa loke ta trata Uo Wetgeving en Juridische Zaken; (3) pa sa e motibunan di e subida di 1.0 mion florin den entrada di dividendonan (aña 2020 kompará ku aña 2018); (4) pa sa ku si tin riesgonan pa realisá e entrada presupuestá di aña 2020 di un total di 11 mion florin pa loke ta trata dividendonan; (5) pa sa kuantu sèn tin presupuestá den aña 2020 pa loke ta trata e plan di urgensia pa mehora kalidat di bida den barionan, (6) pa sa kuantu ta e debe di Refineria Isla Curaçao B.V. na Refineria di Kòrsou N.V. i (7) pa sa kuantu ta e debe di Refineria di Kòrsou N.V na Refineria Isla Curaçao B.V.