Grupo Hats off to Dreams ta duna honor na ‘alta moda’ ku HOTDcouture pa Karnaval50 

Grupo Hats off to Dreams ta duna honor na ‘alta moda’ ku HOTDcouture pa Karnaval50 

WILLEMSTAD — Djadumingu 27 di òktober Grupo Hats off to Dreams (HOTD) a revelá su kreashon pa Karnaval 2020 bou di un públiko entusiasmá na Villa Maria. Pa Karnaval 50, Grupo HOTD a bai bèk den siglo 17, na inisio di kreashonnan ‘alta moda’, ku e tempu ei a nase na kas real Franses. Un di e personanan históriko ku a inspirá loke awendia ta yama ‘alta moda òf Haute couture’, ta e reina rebelde Marie Antoinette. Huntu ku su kosturero, Rose Bertin, kende nan tabata yama e promé ‘Minister of Fashion’ nan tabata pusha limite di loke hende a kustumbrá di bisti i bini ku kreashonnan ekstravagante i ekstraordinario. Esei ta presisamente loke a inspirá Grupo HOTD tambe: pa pensa kon pa engrandesé i revolushoná nos fiesta magno di Karnaval.

Pues pa Karnaval 50, Grupo HOTD ta tresé ‘HOTDcouture’ den kayanan di Kòrsou, dor di bai bèk den kuna di moda i trese esaki bèk den un reimaginashon total. Ku e tema aki nos ta duna honor tambe na tur kosturero i diseñadónan ku durante 50 aña a duna realse na nos Karnaval ku trahe i kreashonnan ku públiko lokal i internashonal por a disfrutá imensamente di dje. Nos ta kita sombre pa nan kreatividat i kurashi i ta sinti nos honrá di por sigui ku e legado aki pa añanan benidero.

HOTDcouture, estilo Grupo HOTD, ta konsistí di trahenan real ku tela di felpa i  detayenan di oro pa aksentuá e trahe. E aksentonan prinsipal ta flornan di diferente koló i tamaño dòrná ku diferente tipo di perla i stenchinan detayá. E promé aspekto eksklusivo ta e tela ‘turquoise’ di flor ku ta diseñá i imprimí  eksklusivamente pa Grupo Hats off to Dreams i tin nos nòmber HOTD den e tela. E di dos detaye sobresaliente, ta un eskudo tambe diseñá i imprimí ekslusivamente pa Grupo HOTD.  E eskudo ta konsistí di 5 elemento:

  • E palu di divi divi; honor na nos raísnan na Kòrsou  i nos pais.
  • E patronchi di HOTD; selebrashon di nos famia karnavalesko i nos miembronan.
  • Un ‘unicorn’ pretu, ku ta dedikashon na tur muhé fuerte.
  • E señal di interdependensia, representando e echo ku nos tur ta konektá i mester di otro. Ta huntu miembro i gruponan ta forma Karnaval.

I mei mei un triangel ku 6 strea ku ta e 6 miembronan ku a funda e grupo.

Pa su di dos aña Grupo Hats off to Dreams lo bai Marcha Grandi ku un kantidat limitá di persona i na e momentunan aki e Grupo tin un lista di espera. Pa mas informashon por bishitá www.hatsofftodreams.com i FB Hats off to Dreams.

 

This site uses Akismet to reduce spam. Learn how your comment data is processed.

%d bloggers like this: