Akuerdo entre Refineria Isla i Refineria di Kòrsou ta pèrkurá pa stabilidat i trankilidat di operashon di nos refineria

Akuerdo entre Refineria Isla i Refineria di Kòrsou ta pèrkurá pa stabilidat i trankilidat di operashon di nos refineria

Geplaatst op 28 Òktober 2019 dor di Ministerio di Asuntunan General i Promé Minister

WILLEMSTAD – E akuerdo ku Refineria di Kòrsou (RdK) i Refineria Isla resientemente a yega na dje mester kontribuí na e trankilidat i stabilidat altamente nesesario, asina nos refineria por drenta den operashon pronto atrobe. Un parti importante di e akuerdo aki ta enserá kitamentu di e ‘beslag’ di RdK ku tabatin riba fondonan di Aqualectra destiná pa Refineria Isla.

Di e forma aki Refineria Isla por kumpli ku su responsabilidat pa loke ta trata e kòntrakt di operashon aktual ku e tin ku RdK, pero tambe kumpli ku su deber relashoná ku tersera persona. Den e kaso aki partikularmente ku su trahadónan. RdK, di su parti, por sigui konsentrá riba e proseso pa pèrkura pa un futuro duradero di nos refineria, despues ku e kòntrakt aktual terminá na fin di aña i un eventual transishon harmonioso mester tuma lugá.

E akuerdo ta resultado di seriedat di e partidonan envolví pa rekonosé e urgensia pa ku e situashon ku a surgi i madures pa huntu sinta ku kabes friu. Den konsulta ku Promé Minister Rhuggenaath, guiá pa Minister Girigorie (den su ròl komo Minister di Asuntunan General interino) i Minister Mc William, Gobièrnu a tuma un posishon aktivo den e totalidat aki pa bin ku un solushon duradero riba término kòrtiko. Tambe mester aploudí den e kuadro aki e aktitut konstruktivo desplegá pa sindikatonan APRI i PWFC pa huntu yega na e akuerdo aki.

E base ku a establesé ku e protokòl entre RdK i Refineria Isla mester sirbi komo modelo kon pa sigui atendé ku otro na un manera sensato i madurá a base di rèspèt mutuo den e próksimo tempunan. Gobièrnu ta konfia ku tur partido lo sigui biba e espíritu di e protokòl aki na bienester di henter Kòrsou, pero prinsipalmente esnan ku ta traha na nos refineria.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: