Último Show pa e aña aki, anto grátis KONSIERTO “FROM THE HEART” KU BONCOEUR & BONCOEUR RIBA FREEWINDS

Último Show pa e aña aki, anto grátis

KONSIERTO “FROM THE HEART” KU BONCOEUR & BONCOEUR RIBA FREEWINDS

WILLEMSTAD – Djamars awor lo tin e último show pa e aña aki riba barku Freewinds na Kòrsou. Ta trata aki di e show “From the Heart”, kaminda lo tin presentashon di tata i yu. Ta trata aki di un konsierto kaminda lo bai mira presentashon di Michael Boncoeur Sr. i Michael Boncoeur Jr. Riba un stage.

Manera ta konosí, Freewinds pa mas ku 30 aña tin Kòrsou komo su base i durante vários aña a bin ta pone su sala  prinsipal na disposishon sea di organisashonnan lokal pa krea fondo pa organisashonnan lokal, pero tambe sa organisá konsiertonan grátis.

Despues di luna di novèmber, Freewinds pa un periodo largu lo ta na Eastren Caribbean, loke ta trese ku n’e ku mas o ménos banda mei mei di otro aña nan lo ta bek aki banda. P’esei e konsierto di djamars awor ta e último pa e aña aki na Kòrsou.

Boncoeur & Boncoeur

Freewinds pensando kon lo por sera aña na un manera great, a kai riba e idea pa kombiná un di nos mihó kantantenan di Kòrsou ku den e kaso aki ta Michael Boncoeur Sr. Ku ya a traha su trayektoria na Kòrsou, kantante den diferente agrupashon musikal i ketu bai ta deleitá pueblo di Kòrsou ku su tremendo bos.

E otro kantante  den e show aki ta yu di Michael Boncoeur Jr. Ku te ku e aña aki tabata biba na Inglatera i tur siman tabata traha komo artista i kantante den e pais britániko aki, spesialmente den músika di R&B i otro género.

E show aki ta mustra di lo bira unu sumamente great, sigur mirando e piesanan ku a keda skohe pa loke ta trata e show, mirando e temporada ku nos ta aden. Pues lo tin kansionnan normal i tambe di Pasku.

Entrada grátis

Entrada pa e show aki ta grátis, pero tur hende mester registrá, dor di manda un whatsapp na +5999 513-0837 pa asina ei kada persona risibí na E-ticket, esta nan karchi di entrada elektronikamente. Kòrda ku ta maksimalmente 300 persona so e sala por karga. Pues esnan ku ta tempran, ta bebe awa limpi. E number ariba menshoná NO ta risibí yamada di ningun, pero únikamente whatsapp via teksto pa registrá.

Te djamars awor