GMN TA ADVERTI PA NO KOME NINGUN SORTO DI SALADA ROMEIN KU TA BIN FOR DI SALINAS VALLEY MERKA. 

GMN TA ADVERTI PA NO KOME NINGUN SORTO DI SALADA ROMEIN KU TA BIN FOR DI SALINAS VALLEY MERKA. 

 

_______________________________________________________________________

 

Tópiko: SALADA DI ROMEIN PROSEDENTE DI ‘SALINA’ CALIFORNIA NA MERKA kontaminá ku e bakteria di E. Coli (O157:H7)

 

Willemstad – Sentro di Kontrolá Malesa na Merka (CDC=Center for Disease Control) a saka un advertensha pa no bende, usa òf kome salada Romein prosedente di ‘Salina’ California na Merka. Esaki debí ku esakinan ta kontaminá ku e bakteria E. Coli. E. Coli ta un bakteria ku normalmente ta biba den tripa di bestia, i si esaki resultá den kurpa humano via di kuminda, e por kousa kram severo den barika, diarea, keintura i sakamentu. Den kasonan mas severo e por tin resultado ku morto. 

Na Merka un total di 40 hende a bira malu den diferente estado di Merka i di kual 20 persona a keda hospitalisá. No a registrá ningun morto.

 

Ministerio di GMN di su banda tambe ta advertí pa no kome ningun forma di salada Romein sea su blachi, kortá òf den bakinan kaminda e salada ta di mix ku otro produkto di kome. Tambe un advertensha ta bai pa restaurantnan pa no sirbi e salada den ningun forma. Si bo a kumpra e salada Romein kaba, tira esakinan afó.  

 

CDC ta enfatisá ku ta solamente salda Romein prosedente di e lugá Salina, California a keda identifiká komo esnan kontaminá. No tin nigun prueba ku otro saladanan prosedente di otro lugarnan na Merka ta kontaminá.   

Na Kòrsou tambe salada Romein prosedente di Salina a keda enkontrá durante inspekshon(nan) hasí dor di THZ/ GMN. A saka esakinan for di rekí. 

Si bo a kumpra salada Romein ku a bin for di Salina, no bende, usa òf kome e salada aki. Por mira esaki ku un sticker ku e nòmber SALINA riba e paki.

Trahadónan di departamentu di Technisch Hygienische Zorg (THZ) di GMN, lo sigui ku  kontròl den lugánan ku ta bende produktonan di konsumo.  

 

Ku e akshonan aki, Ministerio di GMN ta keda traha na bienestar di komunidat di Kòrsou. 

 

23 di Novèmber 2019