Chekmate! Weg’a kaba!

Grupo di karnaval Deluxe Dolls ta bèk den kaya di Banda Bou

 

Mirando e nesesidat pa engrandesé e karnaval di Banda Bou i stimulá mas partisipashon di habitantenan di e parti aki di Kòrsou den e marcha karnaval, un grupo yòn a disidí pa tuma e reto aki i lanta e grupo di karnaval bèk. Den pasado, e grupo aki tabata konosí komo Muñecas de Lujo i a partisipá den karnaval di Banda Bou for di aña 1984 te ku 2007.

E inspirashon di e trahe ta bini for di e wega di agedres. Un wega di strategia den kua ambos kampo tin bista amplio di tur moveshon. Meskos ku e wega di agedres tin su bòrchi riba kua e pionan tin ku move i e reglanan ku e hungadónan tin ku tene nan mes na dje, asina hende tambe tin ku move den bida husando e strategia korekto pa sali dilanti. Ku esaki den mente, e generashon di revelo a disidí di konstruí riba fundeshi di nan mayornan. Hasiendo uso di e pionan ku ta kreatividat, ánimo, amor pa Banda Bou i un toke modèrno, e grupo aki ta bai subi kaya durante marcha di karnaval di Banda Bou 2020!

Si bo ta interesá pa forma parti di un grupo yen di zjeitu i bunita akabá, tuma kontakto ku nos na +5999 693-5806 òf via e página di Facebook Deluxe Dolls pa mas informashon.