Isla a hasi mantenshon debidamente.

Isla a hasi mantenshon debidamente.

Refineria Isla ta lamentá ku atrobe a bolbe krea e impreshon ku Isla tin problema pa hasi mantenshon i ku for di 2017 Isla no a hasi mantenshon. Esaki simplemente no ta kuadra ku e bèrdat. 

Na 2017 Isla a saka ANG 127,349,067.71 na mantenshon. Di e montante aki ANG 75,315,784.50 a bai komo pago direkto na kontratistanan. 

Na 2018 Isla a saka ANG ANG 110,195,676.16 na mantenshon. Di e montante aki ANG 74,216,542.60 a bai komo pago direkto na kontratistanan. 

Pues durante di 2017 i 2018 so, Isla a saka ANG 237,544,743 na mantenshon di nos refineria. 

Isla semper a duna mantenshon prioridat i pa e motibu aki ta lamentá imensamente ku ta sigui ku ponensianan robes ku lo por duna un bista robes di Isla komo kompania. 

E refineria ta den bon estado di mantenshon. Asta e kompanianan ku ta hasiendo “due dilligence” a afirmá ku e refineria ta den muchu mas mihó estado di loke a pone nan kere na promé instante. 

Ta p’esei mes, despues di tabata pará pa algun tempu, awor aki Isla fasilmente a pone dos planta bèk den produkshon sin problema. Aktualmente Refineria Isla ta prosesando krudo den e planta TC-1 i CD-2A. Si no tabata hasi mantenshon, esaki lo no tabata posibel.

 

Departamentu di Relashon Públiko

Refineria Isla Curaçao B.V.