NA MEMORIA DI NILDO MARTIS

NA MEMORIA DI NILDO MARTIS

 

Direktiva di AMAK a tuma nota di fayesimentu di e gran baluarte, intérprete, kompositor Nildo Martis. For di prinsipio di Festival di Tumba den añanan 70, Nildo Martis tabata aktivo den Farándula i un di su promé tumbanan ku a kousa hopi furor tabata e tumba: Un Tabla lo bula. Ta trata aki di un tumba di durashon largu i ku a keda toka durante hopi tempu. Pa motibu di su kontenido i pa motibu ku Nildo a deklará ku ela hasi e tumba largu paso e pueblo ta gosa, esaki a pone ku e tumba aki a keda zona te ku e dia di awe.

Aparte di Festival di Tumba, Nildo Martis a parti diferente agrupashon musikal manera Grupo Tres, La Perfecta, Enica i vários otro agrupashon musikal. Despues di tempu Nildo Martis a tuma e desishon pa bai Ulanda, kaminda aya tambe ela keda aktivo i na hopi okashon e tabata bin Kòrsou bek pa partisipá den Festival di Tumba.

Durante último añanan, Nildo Martis a konfrontá problema ku salú, pero semper bai a keda e mesun persona alegre ku e tabata.

Lamentablemente e lo no tei pa selebrá e di 50 edishon di Festival di Tumba, pero meskos ku esnan ku ya a bai laga nos, AMAK lo buska un fórmula pa rekordá nan tur durante di  e 50 edishon di Festival di Tumba.

Nos ta deseá forsa na famianan di Nildo Martis i nos ta sigur ku Todo Poderoso lo dun’é un bon lugá den su reino. Ku Nildo Martis sosegá na pas.

Direktiva di AMAK

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: