GOBIÈRNU DI KÒRSOU A KEDA INVITÁ PA SANDALS ROYAL CURAҪAO PA RISIBÍ TUR INFORMASHON NESESARIO.

 

GOBIÈRNU DI KÒRSOU A KEDA INVITÁ PA SANDALS ROYAL CURAҪAO PA RISIBÍ TUR INFORMASHON NESESARIO.

 

Willemstad – Gobièrnu di Kòrsou a keda invitá pa Sandals Royal Curaҫao pa por risibí tur informashon nesesario i hasi un “site inspection” dia 3 di febrüari 2022.

Tur e ministernan, Promé Minister Gilmar Pisas, Minister di Desaroyo Sosial, Labor i Bienestar Ruthmilda Larmonie-Cecilia, Minister di Desaroyo Ekonómiko Ruisandro Cijntje, Minister di Finansa Javier Silvania, Minister di Enseñansa, Siensia, Kultura i Deporte Sithree van Heydoorn, Minister di Salubridat, Medio Ambiente i Naturalesa  Dorothy Pietersz-Janga, Minister Maneho di Gobernashon, Planifikashon i Servisio Públiko Ornelio Martina i Minister di Tráfiko, Transporte i Planifikashon Urbano Charles Cooper, tabata presente.

 

E delegashon di Sandals Royal Curaҫao tabata konsistí di srs. Adam Stewart (Executive Chairman), Gebhard Rainer (Chief Executive Officer), Jordan Samuda (Chief Administrative Officer), Kevin Clarke (General Manager Sandals Royal Curaҫao), Marc McKibbon (Director Technical Services), Terrence Desvignes (Project Manager), Ramel Sobrino (General Manager, SRI), sra. Sheryl McGaw-Douse (Group Manager Communications & Public Relations) i sra. Adonia Chin (Business Administration/Government Relations).

E delegashon aki a bini speshalmente Kòrsou pa duna Gobièrnu di Kòrsou tur e informahonnan nesesario, unda tin mester di sosten ainda i hiba kombersashonnan tambe ku tur esnan ku ta enbolbí den e proyekto aki.

 

Sr. Adam Stewart (Executive Chairman),  huntu ku algun hende di su delegashon, a hasi un presentashon, kaminda a splika kon e hotèl aki ta bai funshoná i kiko ta tur loke e ta bai ofresé na su “guest” nan i nos komunidat. A konta tambe un parti di e historia pa ku kon e kadena di Sandals a keda fundá.

Despues di e presentashon amplio aki, por a bai kana riba e tereno pa mira tur loke ta tumando lugá i kiko tur ta bai bini na Sandals Royal Curaҫao.

Gobièrnu di Kòrsou por a tuma nota di tur e trabounan di konstrukshon ku ta ehersiendo einan, kuantu trabou tin i ku tin un avanse enorme ta tumando lugá.

Por a mira e kantidat di trahadonan ku ya tin ta traha na Sandals i banda di esaki ainda tin mester di mas ku 450 hende pa yena e kuponan di trabou ku tin pendiente. Sandals Royal Curaҫao a bisa ku nan tin mester di masomenos 300-500 trahadó en total.

Gobièrnu di Kòrsou pa medio di Minister di Desaroyo Sosial, Labor i Bienestar Ruthmilda Larmonie-Cecilia ta hasiendo lo máksimo pa yena tur e kuponan di trabou aki ku nos mes yunan di Kòrsou.

Un i tur por aserká e Tim di Sandals pa medio di recruitscw@grp.sandals.com  

 

Gobièrnu di Kòrsou pa medio di Minister di Desaroyo Ekonómiko Ruisandro Cijntje a akordá ku Sandals Royal Curaҫao pa “target” e merkado Merikano riba un eskala mas haltu pa asina por trese mas turísta di e merkado aki Kòrsou.

Sandals Royal Curaҫao tin un eksperensia amplio ku e merkado aki i esaki a motibu pa kual e gran mayoria di su “guest” nan ta for di e merkado Merikano.

Ya kaba e “suite” nan di mas luhoso ta di “sold out” te ku aña 2023.

Mirando e nesesidat pa por tin mas “airlift” pa Kòrsou, Sandals Royal Curaҫao a bai di akuerdo pa ta un partner stratégiko den tresementu di mas aerolinea pa Kòrsou.

 

Na final di e presentashon i rekorido a ofresé Gobièrnu di Kòrsou un lunch.

Promé Minister Gilmar Pisas a hasi uso di e momentu aki pa, na nòmber di Gobièrnu di Kòrsou, gradisí e delegashon di Sandals Royal Curaҫao pa tur informashon risibí i alabes pa e kurashi ku nan a tuma pa bin hasi un invershon asina grandi i interesante na Kòrsou.

 

Di parti Gobièrnu di Kòrsou lo sigui duna tur atenshon i sosten na tur esnan ku ta kere i ke invertí den nos ekonomia i yuda pa krea mas kupo di trabou pa nos  mes yunan di Kòrsou.