Ministerio di GMN ketu bai den deliberashon ku institutonan di kuido
Ministerio di GMN ketu bai den deliberashon ku institutonan di kuido
Willemstad – Manera ya ta konosí, djaluna dia 24 di yanüari último, Ministerio di GMN a reuní ku direktiva di e seis (6) diferente institutonan ku ta kai bou di Federashon di Institutonan den Kuido. Motibu di e reunion tabata ku e institutonan di kuido a indiká ku nan situashon finansiero ta rekerí atenshon.
Relashoná ku esaki Ministerio di GMN ta informá ku ketu bai ta den deliberashon ku e institutonan. Aktualmente ta den e fase ku e institutonan a entregá práktikamente tur informashon pa huntu ku Ministerio di GMN inisiá e trayekto pa yega na un solushon finansiero duradero. Por lo pronto lo mantené e “mediastilte” pa asina sigui ku e deliberashonnan den tur trankilidat. E institutonan ku ta den deliberashon ku Ministerio di GMN ta entre otro: Wit Gele Kruis, Birgen di Rosario, SGR Groep, Fundashon Kuido Integral Banda Bou, Thuiszorg Banda Bou i Stichting Verpleeghuizen Curaçao (Betèsda).
