Premier Evelyn Wever-Croes: Premier Evelyn Wever-Croes relaciona cu Rapport di Algemene Rekenkamer BAN HUNTO PERCURA PA NUNCA MAS ARUBA MIRA ASINA TANTO MAL GOBERNACION

Premier Evelyn Wever-Croes:

 

Premier Evelyn Wever-Croes relaciona cu Rapport di Algemene Rekenkamer

BAN HUNTO PERCURA PA NUNCA MAS ARUBA MIRA ASINA TANTO MAL GOBERNACION

ORANJESTAD — E rapport recien di Algemene Rekenkamer riba e proyectonan PPP a bolbe mustra e grado di mal maneho di gobierno anterior. Algun di e puntonan cu mas ta resalta ta cu e gobierno anterior no a tene cuenta cu con ta paga bek pa e proyectonan PPP y cu tin riesgonan cu a keda desconoci te awor recien. Ta e Gobierno nobo mester a bin cu un crisis tax BAVP pa paga e Proyectonan PPP. Ta remarca si cu e crisis tax BAVP ta temporal siendo cu e proyectonan PPP ta dura mas di 20 aña ainda. 

“Nos a haya nos obliga pa bin cu e crisis tax, e BAVP, pa cubri e gastonan di PPP cu na forma iresponsabel e gobierno anterior a endeuda nos pais. Nos intencion ta pa e ta temporal pasobra no ta husto cu ta pueblo mester paga pa e mal maneho. Nos ta buscando otro formanan pa paga e debenan aki pa asina por duna un alivio na comunidad. 

Cu e rapport aki riba mesa, ta otro prueba cu e daño cu gobierno anterior a haci contra nos pais, ta hopi grandi. E bon noticia ta cu nos Gobierno ta solucionando e problemanan aki causa pa e gobierno anterior, y despues cu nos pais a conoce deficitnan gigantesto te na 400 miyon florin, nos ta yegando awor ta un surplus riba presupuesto. Esaki ta marca un era nobo, un era di finansas saludable y un era di bon gobernacion. Pueblo a pidi e cambio aki na 2017, y apesar cu e retonan cu nos a enfrenta ta haci’e dificil, nos ta logrando di pone orden y crea stabilidad y finansas saludable. Pasobra esaki ta e unico forma pa crea progreso y bienestar pa tur ciudadano, sin laga ningun hende atras”, segun Premier Evelyn Wever-Croes