Djamingu awor, 22 di desèmber próksimo Grandioso Selebrashon  Fin di Aña pa Nos Grandinan

Djamingu awor, 22 di desèmber próksimo

Grandioso Selebrashon 

Fin di Aña pa Nos Grandinan

Djadumingu awor, 22 di desèmber próksimo, Fundashon Nos Grandinan lo tene su gran Selebrashon di Fin di Aña pa nos grandinan por lo general, nos grandinan den kasnan di kuido i tambe nos grandinan riba rolstoel ta mas ku bonbiní. Manera tur hende sa, Fundashon Nos Grandinan su eventonan ta pone ku niun hende no ke bai kas ora aktividat kaba, simplemente debí na e hecho ku inkonsientemente nos grandinan ta haña nan terapia musikal i e sintimentu real di nostalgia ku tambe aportá na mas bida i felisidat. Un biaha mas, Fundashon Nos Grandinan a perkurá pa un tremendo line-up: lo bai tin Kor Moment of Praise na inisio ku alabansa pa nos grandinan i sosteniendo Aña di Kaha di Òrgel lo bai tei Ka’i Òrgel El Águila. Tambe lo bai tei e típiko fenomenal ku pueblo di Kòrsou, spesialmente nos grandinan, ta asina enkantá ku nan ku ta Típiko Pasa Bon. DJ Stevy Zimmerman tambe ta preparando den bullpen un repertuorio di piesanan inolvidabel di Fin di Aña i tambe lo bai tei nos 2 Bolerista hopi kotisiá ku ta Dennis Cecilia i Wilbert “Ibi” Petronella ku lo wòrdu akompañá pa Enrico Henriquez i su Curaçao Banda Show. Por último, lo bai tin 2 sorpresa estilo que sorpresa pa nos grandinan ku lo pone nos grandinan apresiá Fundashon Nos Grandinan aun mas pa e atenshon spesial ku a prepará pa nan. Tur esaki lo tuma lugá den Hòfi Wayacá, aya na Huize Welgelegen Habaai di 1:00PM pa 7:00PM. Entrada ta gratis pa tur hende! Pues, nota den Boso agènda for di awe i reservá djadumingu, 22 di desèmber próksimo, pa e grandioso Selebrashon Fin di Aña pa Nos Grandinan en general. Manera semper, bar i kushina ta prèis abou abou. Pa mas informashon, por tuma kontakto na 560-0686.