Klientenan di SOAW a terminá proyekto “Mi ke, Mi Por” ku éksito

Klientenan di SOAW a terminá proyekto “Mi ke, Mi Por” ku éksito

Geplaatst op 19 December 2019 dor di Ministerio Desaroyo Sosial, Labor i Bienestar

Willemstad – “Mi ke, Mi Por” ta un proyekto di Sektor di Desaroyo Sosial di Ministerio Desaroyo Sosial, Labor i Bienestar (SOAW) kreá pa klientenan ku tin un areglo di pago “sosial” ku Aqualectra. E sektor a konstatá for di 2017 ku tin un kresementu supstansial di kliente di SOAW ku tin debe di lus i awa na Aqualectra. Mester a hasi algu pa klientenan sali for di e gara di debe. Pues, na 2017 a inisiá un programa di konsientisashon i saneamentu di debe ku segun tempu a keda perfekshoná pa profeshonalnan hóben di SOAW.

Pa mehorá e servisio pa asistí e kliente mas mihó, SOAW a sinta den luna di òktober 2019 ku Aqualectra i a akordá, entre otro, ku Aqualectra ta pone SOAW dos siman adelantá na altura di e momento ku lo deskonektá un kliente ku tin ònderstant. Tambe Aqualectra lo traha un banko di dato kaminda ta rekonosé e klientenan ku tin ònderstant komo entrada.

E aña aki e proyekto “Mi ke, Mi por” a tuma luga den luna di òktober i novèmber.
Algun tema ku a ser tratá ta: 1. Hasi e kliente konsiente di e importansia di uso efektivo i efisiente di awa, elektrisidat, gas etc; 2. Uso efektivo di sèn; 3. Promové sentido di outo-efisiensia i independensia serka e kliente; 4. Stimulá kambio di komportashon di tal forma ku e no ta ripití kreashon di debe; 5. Siña e kliente fiha prioridatnan mas mihó.

Algun resultado di e programa ta enserá ku kursistanan a logra baha nan gastunan. Tambe tin kliente ku debí na e proyekto a logra terminá nan areglo di pago (yega na 0 debe). Klientenan a bira mas konsiente di e formanan pa ekonomisá, gasta ménos dor di duna kada florin un bon destino. Tin di nan ku a kuminsá planta nan mes fruta i bèrdura.

Sektor di Desaroyo Sosial lo keda mehorá i ankra e programa aki den su lista di servisionan pa den futuro logra ku mas kliente por sera un areglo di pago, kumpli ku nan areglo pa asina sali for di e sírkulo di debe na Aqualectra.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: