Prome Minister Evelyn Wever-Croes GOBIERNO DI ARUBA Y CITGO NEGOCIANDO UN ACUERDO DI TERMINACION Y SUSPENSION E MIHO COS CU POR PASA PA ARUBA, TA SI CITGO BAY!

Prome Minister Evelyn Wever-Croes

 

GOBIERNO DI ARUBA Y CITGO NEGOCIANDO UN ACUERDO DI TERMINACION Y SUSPENSION

 

E MIHO COS CU POR PASA PA ARUBA, TA SI CITGO BAY!

Desde cu Gabinete Wever-Croes a drenta gobernacion dia 17 november 2017, Gobierno a cuminsa delibera cu Citgo pa haya un compromiso di Citgo pa cumpli cu e contrato cu nan a firma na 2016 cu Gobierno di Aruba. E deliberacionnan no a bay facil y tabata hopi dificil pa haya un compromiso di parti di Citgo. Esaki debi na e situacion na Venezuela y PdVSA, y e sancionnan di Merca y Europa contra Venezuela, sancionnan cu cada biaha tabata wordo intensiva. Cada biaha Citgo tabata presenta plannan ahusta, con nan ta kere cu nan por cumpli, pero tabata tira e responsabilidad riba OFAC, autoridad Mericano.

 

Pa e motibo ey, un delegacion di Gobierno di Aruba y refineria di Aruba, encabesa pa Prome Minister Evelyn Wever-Croes, a bay reuni cu OFAC na Washington. Eynan a sali na cla cu Citgo no tabatin ningun intencion di sigui inverti den Aruba, pasobra nan a pidi un licencia di OFAC pa “wind down”, esta pa cera e refineria. E momento ey a bin un cambio den e relacion cu Citgo, pasobra tabata hopi cla cu nan lo bay.

 

E pregunta e momento ey tabata si nan ta bay sin paga e trahadonan loke trahadonan tin derecho riba dje of si berdad nan ta bay cumpli cu trahadonan. Den e prome acercamentonan, Citgo a indica cu no tin fondo pa paga trahadonan pa mucho tempo mas. Gobierno di Aruba su posicion desde e momento ey ta cu esaki no ta aceptable y den tur contacto cu Gobierno tabata tin cu Citgo desde e momento ey a exigi pa Citgo cumpli cu trahadonan completamente manera ley ta stipula.

 

A base di esaki, na october a firma un MoU cu Citgo pa cuminsa negocia e acuerdo di terminacion y suspension. Cu e firmamento di e MoU, Gobierno a haya e permiso pa cuminsa busca un operador nobo. E proceso ey tampoco a bay facil pa motibo cu Citgo no ta duna su cooperacion. Cualkier interesado kier mira e estado di e refiernia prome cu nan haci un oferta serio pero Citgo no ta permiti esey. Prioridad di Gobierno di Aruba ta pa busca un operador nobo, un operador serio, un operador cu si por cumpli cu e palabracionnan cu Gobierno y cu trahadonan. Pa nos logra esaki, Citgo mester bay di berdad, sino nunca nos por haya un otro operador.

 

Awor Gobierno di Aruba y Citgo ta parse di ta den fase final cu e negosacion di e acuerdo di suspension y terminacion. Asina Citgo a informa e 77 trahadonan, y a ofrece nan pakete di retiro. Segun e comunicado cu Citgo a manda pa trahadonan, e ta referi na e acuerdo cu Gobierno di suspension y terminacion, y p’esey ta ofrece nan pakete di retiro entrante fin di januari 2020. Varios trahado a pidi pa e compania RdA of Gobierno tuma e trahadonan over pero ni RdA ni Gobierno tin fondo pa haci esey. 

E miho cos cu por pasa pa Aruba y pa e trahadonan ta pa Citgo bay mas lihe posibel, pa Gobierno haya un operador nobo, cu por tuma e trahadonan na trabou di nobo. Tanten Citgo no bay, nos no ta yega na e punto ey. Gobierno di Aruba ta haciendo e maximo esfuerso pa negocia e acuerdo aki den miho interes di pais Aruba y esaki sigur no ta facil pasobra e contract a duna Citgo hopi derecho y privilegio cu Citgo no kier laga bay sin mas. Sinembargo Gobierno tin confiansa cu aña 2020 lo habri nos cu e oportunidad di busca un partner serio entre tur esnan cu a reacciona caba, pa asina por logra habri e refineria bek mas pronto cu ta posibel.