Gobièrnu i CTB ta firma akuerdo pa ehekutá proyektonan riba término korto pa e área di Zakitó

Gobièrnu i CTB ta firma akuerdo pa ehekutá proyektonan riba término korto pa e área di Zakitó

 

WILLEMSTAD – Yanüari 3, 2020 – Djaweps 2 di yanüari Gobièrnu di Kòrsou i Ofisina di Turismo di Kòrsou (CTB) a firma un akuerdo pa ehekutá e asina yamá “Quick Win Plan” Zakitó. E plan aki ta un di e puntonan di akshon di e vishon pa desaroyo di e área di Zakitó kual a keda akordá na desèmber di aña 2018 dor di Konseho di Ministernan. 

 

E puntonan di salida di e vishon ta inkluí: mantené e balor outéntiko/históriko di e área i akseso liber pa laman. E “Quick Win Plan” ta enserá ku lo hasi diferente mehorashon  (“upgrade”) chikitu ku ta hisa e balor di e área i alabes hasié mas atraktivo pa nos komunidat por hasi uso di dje i tambe pa generá interes di posibel invershonistanan. Entre otro lo hasi limpiesa profundo, pone mas iluminashon, drecha un playa na Koredor, drecha parti di e área pa kana na Koredor i krea fasilidatnan pa por organisá eventonan den Zakitó. Konforme e planifikashon e trabounan lo kuminsá den e promé kuartal di e aña aki. Di e manera aki Gobièrnu di Kòrsou ta sigui invertí den nos ekonomia i alabes yuda krese nos produkto turístiko. 

 

Riba e portrèt por mira momento ku Minister Giselle Mc William i sr. Hugo Clarinda huntu ku sr. Paul Pennicook di Ofisina di Turismo di Kòrsou ta formalisá e palabrashonnan.