25 aña di mi bida m’a dediká na e tema bario.
25 aña di mi bida m’a dediká na e tema bario.
Si no traha ku seriedat riba mehorá e situashon den barionan, nos pais ta kore e riesgo di kai atras den mundu kousá pa pobresa, mal repartishon, deterioro sosial, krímen i otro problemanan sosial. Awe 7 di yanüari 2020 ta presis 25 aña ku mi a start ku dedikashon intensivo na e tema bario atraves di radio i ku publikashonnan den korant i despues tambe riba facebook. Djis un par di aña e tempu ei ku mi a kuminsá na Curom/ Z’86, m’a pasa over pa radio Hoyer. Na radio Hoyer gran mayoria di e transmishonnan a tuma lugá. E solo di pueblo su frekuensia 1010 i awendia 101.9FM. Ounke e titulo di programa ta enfatisá importansia di bario, e punto di enfoke prinsipal a sigui ta bisiña, komo tal tantu den Kòrsou mes, komo pafó di nos frontera ku pueblonan bisiña. E realidat aki a pone un base firme pa fomentá kombibensia, sentido di solidaridat, fortifiká identidat i formamentu di tur sorto di aliansa. Netamente e puntonan ariba menshoná a hiba BpB na transmishonnan históriko den kadena ku radio-emisoranan na Cuba (radio Progreso), na Sürnam ( SRS, Sky, Apintie), na Santo Domingu (radio Patria), na Venezuela (radio Coro 780) i resientemente La Guajira /Colombia (radio Rumba RCN). E proverbio: “Mihó un bon bisiña ku un famia djaleu”, nos a bib’é konsiente! Korantnan La Prensa, Ultimo Noticia i NOBO tabata saka e publikashonnan di Bario pa Bario semanalmente, pero por lo general ta tur korant na Kòrsou, pa ta eksakto Bala, Extra, Amigoe, Antilliaans Dagblad i Vigilante, tur sa duna atenshon amplio na publikashonnan di Bario pa Bario. Hopi sosten nos a haña di tur e otro radio-emisoranan popular na Kòrsou i televishon. Programa Bario pa Bario pa tur e motibunan menshoná a bira un programa masha pegá den pueblo di Kòrsou i awendia debí na tur e medionan sosial moderno, e tin un alkanse enorme pafó di frontera, esta na Ulanda, e otro islanan Aruba, Boneiru i Islanan Ariba, Merka, Costa Rica, Venezuela i sigui menshoná bai. Fo’i prinsipio Bario pa Bario tabata ku e meta pa BARIO bira e ángulo for di kua ta traha sistemátikamente na progreso i adelanto di Kòrsou, loke outomátikamente ta rekerí envolvimentu di gobièrnu, di komersio, habitantenan i organisashonnan di bario. Durante 25 aña hopi kos a sosodé, komo tal no ta na ami pa bisa kiko tur e esfuersonan atraves di e programa a kontribuí kuné, mi sa sí i mi ta hopi konsiente ku di nos parti a yuda tene e tema bario bibu na Kòrsou pasobra tendensianan fuerte di individualismo i materialismo no a hasi e sirkunstansia nada fásil. Tòg ainda mi ta konvensí ku un dia e ángulo ku ta enfatisá bario of zona den gobernashon lo bira asina esensial ku e lo keda transformá den e punto di lansa pa alsa kalidat di bida riba e teritorio kurasoleño, pasobra ta e úniko fórmula sistemátiko di gobernashon ku lo hasi retonan importante manera limpiesa di Kòrsou i mantenshon di e teritorio aki limpi, desaroyá turismo riba un base profundo i duradero posibel, krese e interes pa plantashon i krio di bestia efektivamente, mehorá e aktitut rigurosamente positivo versus mantenementu di medioambiente i naturalesa optimal, pero tambe prevení krímen, pobresa, deterioro sosial i garantisá seguridat den e sentido mas amplio di palabra. Aktualmente ku nos ta den aña 2020 Marlon Regales i Ami ta esnan ku ta guia e programa, pero berdaderamente hopi ta esnan ku den pasado a traha huntu ku mi i di nan forma a hasi e programa aki posibel, uzando nan talento, kapasidat i konosementu. Algun di e personanan ku mi ta referí na dje aki ya no tei mas. Ounke den un tempu finansieramente sumamente difísil, manera nos ta pasando aden, ku orguyo i gratitut mi por wak atras i rekordá e kantidat di patrosinadònan ku programa Bario pa Bario a konosé. Naturalmente tur a sirbi pa mantené e programa aki den aire. Na Kòrsou kada suidadano mester sigui profundisá den nifikashon i importansia di bario pa komprondé ku ta un entidat ku e potensial pa brinda Kòrsou prosperidat i tur otro benefisio faborabel ku ta rekerí envolvimentu kolektivo. Mi ta konsiderá 25 aniversario di Bario pa Bario un logro memorabel i importante den mi bida, komo tal mi ta gradesí Dios Tata Todopoderoso p’esei i tur ku a hunga un papel krusial den e logro aki, asina ei mi no por keda sin menshoná radio Hoyer pa tur e añanan, Curom Z’86 kaminda m’a kuminsá, patrosinadònan i miembronan di komunidat super entusiasmá ku temanan ku nos sa trata i aspektonan spesial pa tira un lus mas aya riba. DANKI, nos ta bai pensa aktividatnan apropiá pa selebrá i demostrá nos gratitut, pero ku mas esfuerso ainda pa duna bario e empuhe fuerte ku e meresé.
ERWIN RAPHAËLA