Minister Mc William a bishitá 14 hóben ku ta koriendo stazje na Corendon Village, Amsterdam
Minister Mc William a bishitá 14 hóben ku ta koriendo stazje na Corendon Village, Amsterdam
Geplaatst op 17 January 2020 dor di Ministerio Desaroyo Ekonómiko
AMSTERDAM- E dianan aki Minister Giselle Mc William ta na Hulanda ku un biahe di trabou. Un di e promé paradanan na yegada di minister Mc William, tabata un bishita na e promé 14 hóbennan yu di Kòrsou ku aktualmente ta den un fase di entrenamentu na Corendon Village ,Amsterdam.
Intenshon di e entrenamentu aki ta, pa e hóbennan aki wòrdu bon ekipá por bin bek seguidamente i laborá den Corendon Mangrove Park Curaçao.
Manera ta konosí Corendon for di inisio a komprometé su mes pa kapasitá mas tantu yu di tera posibel pa por drenta den servisio na Corendon Mangrove Park ku próksimamente den luna di aprel mester habri su portanan aki na Kòrsou i esakinan ta e promé tanda di hóbennan lokal ku a risibí e oportunidat aki.
Tabata realmente un orguyo pa Minister Mc William por a topa i skucha e entusiasmo di e hóbennan aki ku nan trabou i tur lokual nan ta siña diariamente durante nan stazje pa por bini bek i ehersé nan trabou na e mihó di nan kapasidat.
E hóbennan aki a biaha pa Hulanda na prinsipio di yanüari i lo regresá fin di luna pa asina kuminsá prepará pa apertura di Corendon Mangrove Park kaminda nan lo bai laborá próksimamente.
