Fundashon Pro Souax  a entregá pakete di komestibel i su foyetonan pa aña 2020

Fundashon Pro Souax  a entregá pakete di komestibel i su foyetonan pa aña 2020
                  

Fundashon Pro Souax resientemente a tene su promé reunion di direktiva pa e aña ku a kaba di kuminsá. Den e reunion aki kaminda e direktiva a presentá na su boluntarionan su plan i aktividatnan regular pa aña 2020, tabatin tambe e oportunidat pa boluntarionan sera konosí ku e miembronan nobo di e direktiva. E direktiva di Fundashon Pro Souax ta presidí pa sr. Juny Sluis i mas aleu ta konsistí di: sra. Gertrude Isidora, sra. Nieves Richardson, sr. Alwin Jansen,
sr. Erwin de Windt i sr. Norman Girigorie.
Kontinuando ku su akshonnan na interes di bario di Souax, Fundashon Pro Souax na okashon di kuminsamentu di aña a entregá na algun famia un pakete di komestibel ku nan lo por hasi uzo di dje. Durante e reunion di direktiva tur boluntario presente a risibí entre otro: e kalendario pa 2020 di aktividatnan di Sentro di bario Souax; e foyeto di e diferente servisionan ku habitantenan por haña na Sentro di bario Souax  i tambe informashon di e skolnan di baile, músika i kòmpiuter di e sentro di bario. Personanan interesá pa risibí e foyetonan aki, por tuma kontakto ku Sentro di bario via: telefòn 868-8170 / 522-8170 ; telefòn/app: 561-2832 òf por mail na fundashonprosouax@gmail.com .