Kòrsou kier atraé mas turista dor di e partnership ku Ajax
Kòrsou kier atraé mas turista dor di e partnership ku Ajax
WILLEMSTAD – Yanüari 20, 2020 – Entrante e partido di djadumingu 19 di yanüari, e ekipo di Ajax ta hunga ku e logo di Curaçao di forma prominente riba e manga di e shùrt di Ajax. Promé ku e partido entre Ajax i Sparta, e akuerdo entre Ofisina di Turismo di Kòrsou (CTB) i Ajax a keda ofisialisá durante un seremonia ku a konta ku presensia di Giselle Mc William, Minister di Desaroyo Ekonómiko i direktor di Ajax, Edwin van der Sar.
E akuerdo aki ta inisio di un kolaborashon intensivo den kual Kòrsou lo bai keda profilá bou di e miónes di simpatisantenan di Ajax na Hulanda i rònt mundu komo un destinashon ku ta brinda posibilidatnan amplio. Ajax tin 42 mion simpatisante na Europa, 20 mion na Nort Amérika i 16 mion na Sur Amérika.
E logo riba manga di e shùrt ta un di e hopi promoshonnan den kual Kòrsou lo ta visibel rondó i durante di e partidonan i kaminda tambe lo por mira e promoshonnan di Kòrsou durante transmishonnan di televishon ku ta yega henter mundu. Banda di e logo riba manga di e shùrt, tambe lo tin spòtnan di Kòrsou ta pasa riba pantayanan grandi den Johan Cruijff ArenA i otro formanan di promoshon di Kòrsou tambe lo ta visibel riba pantayanan digital den e stadion i tambe na e rant abou di e stadion. Ademas e logo lo ta visibel riba e bòrchi ku ta visibel patras di e hungadónan na momentu ku nan ta keda entrevistá dor di diferente media. Tambe lo hasi uso di e alkanse internashonal enorme di e plataformanan promoshonal di Ajax manera por ehèmpel e miónes di siguidónan riba diferente plataforma di social media pa asina promové Kòrsou bou di potensial bishitantenan i laga nan sera konosí ku Kòrsou su posibilidatnan komo destinashon turístiko.
Pero e mihó eskoho ta pa nan bin eksperensiá Kòrsou. Durante e partnership tantu Ajax 1 komo e ekipo di ‘Ajax Legends’ kual ta un ekipo ku ta konsistí di hungadónan di Ajax konosí di den pasado, lo bishitá Kòrsou pa sera konosí ku Kòrsou su hospitalidat i tur loke e pais tin di ofresé. Durante di e bishita aki e ekiponan lo forma parti di diferente evento promoshonal.
Banda di e benefisio promoshonal mundial komo parti di e promoshon di Kòrsou tambe a papia komo parti di e partnership riba mas kolaborashon deportivo entre Kòrsou i Ajax. Esaki ta pas kompletamente den e strategia general di Kòrsou pa fortifiká e posishon komo hub deportivo den region i pa traha espasio pa propio talentonan deportivo manera ta keda hasí den e kolaborashon ku Major League Baseball (MLB).
Minister Mc William a indiká; “Turismo ta un pilá importante pa desaroyo ekonómiko di Kòrsou. Pa sigui laga turismo krese e próksimo añanan den e diferente merkadonan, CTB semper ta buska maneranan nobo pa oumentá e promoshon pa Kòrsou i laga mas tantu hende posibel sera konosí ku Kòrsou komo un destinashon turístiko atraktivo. Un kolaborashon ku un marka mundialmente konosí manera Ajax i e alkanse internashonal i balor promoshonal ku e partnership aki ta generá ta un stap grandi den e desaroyo ekonómiko di Kòrsou.
