Promoshon di Kòrsou komo Pais Turístiko ta nifiká pan riba mesa pa nos hendenan

Promoshon di Kòrsou komo Pais Turístiko ta nifiká pan riba mesa pa nos hendenan

 

Den último dianan nos a tuma nota di lansamentu di nòmber di nos pais riba unifòrm di un tim di futbòl di Eredivisie na hulandes kual Ajax. Esaki a keda hasi dor di nos Ofisina di Turismo (CTB). Esaki sigur ta un logro signifikante i tin nifikashon grandi pa nos pais prinsipalmente den e ramo di turismo.

 

Deporte ta lider den trese inovashon den medio di komunikashon. Atrabes di transmishonnan di deporte ta purba kada biaha ku sistemanan nobo pa hasi promoshon. Sport advertising ta un trend sumamente eksitoso i a bira un sub division di marketing òf merkadeo. Ta pa e motibu aki paisnan ku ke promové nan mes òf kompanianan grandi ku ke hasi propaganda mas i mas ta usa sea un liga di deporte òf un ekipo di deporte.

E promoshon ku nos pais lo haña atrabes di e ekipo Ajax ta algu masha grandi. Durante kada wega di Ajax tantu den kampeonato Hulandes, komo den kampeonato Europeo e nòmber di Kòrsou lo pasa tantu biaha riba kanalnan internashonal ku ta transmitiendo e wega. Ajax pa tres aña lo mester tene un trainings camp na nos pais i e expose ku nos lo haña ta algu inmenso ya ku nos lo ta riba website di Ajax konstantemente. E return on investment ta algu grandi pa nos pais.

 

No ta gobièrnu pero ta CTB  ta bai promové nos pais ku e fondonan ku normal nan ta usa pa promoshon. Ku esaki CTB a skohe un sistema mas agresivo ku ta rende mas paso tin muchu mas tantu kobertura. E minister di Desaroyo Ekonómiko ku ta su kartera ta apoyá e esfuersonan di CTB pa usa un ekipo di futbòl di nòmber den Europa pa promové nos pais rònt mundu. Un bon inisiativa ku sigur lo tin un bon rendimentu pa nos pais.

 

No laga nos kompará esaki ku sponsoring di nos selekshon nashonal, ni ku deporte lokal pasobra nos no ta sponsor Ajax. Lokual ku CTB ta hasi ta promote Kòrsou usando Ajax komo medio di promoshon turístiko pa nos pais.  

 

E balor agregá na nos ekonomia ta importante mirando e impakto ku e promoshon lo tin riba nos merkado turístiko. E promoshon aki lo duna mas konosementu di nos pais na  Europa en partikular i mundu en general, lokual lo resultá den oumento di nos turismo.  

Oumento di nos turismo lo redunda den mas demanda pa kamber i mas hende di afó ku ta bin gasta aki na Kòrsou. Mas demanda pa kamber ta nifiká konstrukshon di mas kambernan di hotèl. Esaki lo resultá den mas aktividat ekonómiko ku lo resultá den mas kupo di trabou pa nos hendenan ku ta nifiká Pan den kas pa mas kas di famia.

 

Frakshon di MAN ta felisitá Pueblo di Kòrsou, tambe nos Minister di Ekonomia sra Giselle Mc William i Ofisina di Turismo ku e logro grandi aki pa Kòrsou i pa sigui hasi e esfuersonan na bienestar di nos Turismo.

This site uses Akismet to reduce spam. Learn how your comment data is processed.

error: Content is protected !!
%d bloggers like this: