Dia di Betico Concierto Grupo di Betico: Minister Xiomara Maduro ta gradici tur musico y cantante pa haci e Concierto di Grupo di Betico uno magnifico

Dia di Betico Concierto Grupo di Betico:

Minister Xiomara Maduro ta gradici tur musico y cantante pa haci e Concierto di Grupo di Betico uno magnifico

 

ORANJESTAD – E manifestacion cultural riba Dia di Betico e aña aki a kibra tur expectativa cu un concierto di Grupo di Betico y orkesta riba Plaza G.F. Betico Croes. E evento aki a resulta den uno magno y sobresaliente cu ainda ta wordo comenta den pueblo. Minister di Cultura ta expresa palabranan di pabien y agradecimento na tur musico y cantante di Grupo di Betico y orkesta cu a engrandece e concierto. Un danki tambe na e artistanan invita Margareth Marin, Zaina Falconi, Jeon y Claudius Philips.

 

Despues di e concierto e mandatario encarga cu cultura a bay “backstage” y personalmente a gradici Grupo di Betico pa nan tremendo concierto presenta na honor di Betico na ocasion di su fecha natalicio, como tambe e mandatario a gradici e musiconan cu a bini di exterior pa presenta den e magnifico concierto aki.