Parlamentario Jacinta Constancia: Epidemia di Coronavirus ku a kontagiá diferente persona na diferente paisnan di mundu i Kòrsou lo no ta un eksepshon

Willemstad, 31 di yanüari 2020

 

Presidente di Parlamento di Kòrsou

Señor W. Millerson

Wilhelminaplein # 4

PRESENTE

 

Señor Millerson,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di GMN, señora Suzanne Camelia-Römer.

 

Danki pa e koperashon.

 

Atentamente,

 

Jacinta Constancia

Miembro di Parlamento pa

Frakshon di MFK

 

Minister di GMN

Señora S. Camelia-Römer
PRESENTE

Kòrsou, 31 di yanüari 2020


Tópiko: Epidemia di Coronavirus ku a kontagiá diferente persona na diferente paisnan di mundu i Kòrsou lo no ta un eksepshon

 

Señora Minister Camelia-Römer,

 

Pa medio di esaki suskrito Jacinta Constancia, miembro di Parlamento di Kòrsou pa frakshon di MFK ta aserka bo persona komo minister enkargá ku Salu Medio Ambiente i Naturalesa (GMN) ku e siguiente preokupashon. 

 

World Health Organization a dekretá un emergensia mundial relashoná ku e epidemia di Coronavirus. Nos por a skucha Dr. Keli i Dr. Gerstenbluth duna informashon riba e vírus aki, loke pa frakshon di MFK ta mas preokupante ta ku Dr. Gerstenbluth a deklará ku e no tin duda ku e vírus lo yega Kòrsou tambe.

 

Frakshon di MFK no a skucha Minister duna ningun deklarashon ofisial riba e tema aki. Pa frakshon di MFK no ta sufisiente di tende ku hospital nobo tin sufisiente kamber kaminda por isolá personanan ku ser detektá ku e vírus aki. Nos kier skucha akshonnan mas konkreto di gobiernu i kua ta e medidanan ku lo tuma pa detektá i evitá ku e vírus aki no plama riba Kòrsou.

 

Nos ta den temporada di karnaval i ta konosí ku karnaval ta un aktividat ku ta atraé hopi turista for di eksterior i mester hasi e kontrolnan nesesario riba e vírus na entrada di nos aeropuerto i haf.

 

Esakinan ta motibu pa suskrito aserka Minister komo e máksimo outoridat na GMN, konforme artíkulo 96 di reglamentu di Orden, ku e siguiente preguntanan;

 

  1. Minister  a tuma nota di e loke World Health Organization a dekretá relashoná ku Coronavirus?

 

  1. Kua ta e akshonnan konkreto ku gobiernu lo tuma pa por detektá ku un persona ku yega Kòrsou ta infektá ku e vírus aki?

 

  1. Tin akshonnan konkreto ta tumando lugá na aeropuerto i na hafnan kaminda barkunan krusero ta mara pa trata na detektá ku personanan ku ta yega Kòrsou ta infektá ku e vírus?

 

  1. Kon e departamentonan di GMN ta prepará pa atendé ku e vírus aki?

 

  1. Kon Curaçao Medical Center ta prepará i ekipá pa atendé ku e vírus aki?

 

 

  1. Kòrsou ta dispone di sufisiente material, manera trahe nan spesial pa esnan den kuido bisti pa por atendé ku un persona infektá si esaki ta nesesario?

 

  1. Ki dia Minister lo komuniká pa medio di un diskurso nashonal ku pueblo di Kòrsou pa informá di e akshonnan ku gobiernu lo tuma pa ta trata lo mas tantu posibel pa kontené entrada di e vírus aki na Kòrsou?

 

Mirando seriedat di e epidemia aki nos ta spera ku señora Minister Camelia-Römer lo tuma akshonnan firme na bienestar i protekshon di nos komunidat i ku suskrito lo haña kontesta riba su preguntanan den un tempu rápido. 

 

Atentamente,

      

 

Jacinta Constancia

Miembro di Parlamento pa

Frakshon di MFK

This site uses Akismet to reduce spam. Learn how your comment data is processed.

error: Content is protected !!
%d bloggers like this: