Proverbio 26-27, ta bisa ku esun ku koba un pos paotro, e mes lo kai aden, esun ku skupi den laira, den su kara e ta kai

Proverbio 26-27, ta bisa ku esun ku koba un pos pa otro, e mes lo kai aden

Esun ku skupi den laira, den su kara e ta kai

“Gelegenheidswetgeving” ta violashon di derechi di un siudadano

 

“Landsverordening Integriteit (Kandidaat) Ministers”, mihó konosí komo lei di “screening”, ku a wòrdu aprobá na òktober 2012, na Plaza Hotel pura pura promé ku elekshon i di kual e dokumentonan korespondiente no ta den e sistema di Parlamento. Nunka a wòrdu traha pa sirbi interes general, e lei aki mester wòrdu katalogá komo un “gelegenheidswet”, ku otro palabra un lei pa sirbi un meta òf un propósito ya definí.

 

E espíritu tras di e lei aki tabata pa eliminá un solo persona, esnan ku a traha e lei aki for di prinsipio a inkorporá artíkulonan pa sirbi e propósito pa kual nan a traha e lei aki. Un di e artíkulonan aki ta, ku ora un keho wòrdu entrega na Ministerio Públiko kontra di un kandidato pa bira Minister e kandidato no por wòrdu konsiderá pa bira Minister òf si entrega un keho kontra di un Minister den funshon i Ministerio Públiko disidí ku nan ta bai persiguí e Minister aki e Minister mester entrega su retiro.

 

Na momento ku a aprobá e lei aki na aña 2012, e artíkulo aki a funshoná manera tabata deseo di esnan ku a traha i aprobá e lei aki den Parlamento. Nos por a tuma nota ku djis despues ku e lei a wòrdu aprobá ku;

 

• Dia 8 di sèptèmber 2012, un siudadano hulandes oropeo di fam Verstappen a entrega un keho kontra di Gerrit Schotte
• Djasabra 20 di òktober 2012, un dia despues di elekshon di 19 di òktober 2012, un persona anónimo a entrega un keho por eskrito di mas ku 40 blachi kontra di Gerrit Schotte na Ministerio Públiko
• Na sèptèmber 2012 e organisashon FAS ku a wòrdu lanta 11 di yüli 2012, ku su statutonan di “streamline” ku e lei di “screening” ta entrega un keho na Ministerio Públiko relashoná ku “MOT-melding” kontra di Gerrit Schotte

 

Tur esaki ta ilustrá ku esnan ku a bin ku e lei aki a logra nan propósito, pero nan a lubidá ku ora bo skupi den laira, den bo kara e ta kai. Nos por tuma nota ku dor di entrega di keho na Ministerio Públiko, e mesun lei aki a kobra ya dos víktima den Gabinete Rhuggenaath. Manera ya menshoná e lei aki no a wòrdu traha pa sirbi interes general, miéntras ku e proposishon di lei ku a wòrdu entrega dor di gabinete Schotte, si a wòrdu traha pa sirbi interes general.

 

E lei a sirbi e propósito ku a traha e lei p’e, esta eliminá Gerrit Schotte, pero awor ku e lei ta mishi ku esnan ku e lei no tabata intenshoná p’e, awor si e lei ta suheto na kambio, kaminda for di nasementu di e lei, esaki tabata un lei ku mester a sirbi interes general.

 

Charles Cooper

Parlamentario pa Frakshon di

Movementu Futuro Kòrsou