Petishon pa dos reunion publiko di parti di frakshon di MFK

Publiko di parti di frakshon di MFK, ku topiko.

1. Petishon pa reunion públiko di Parlamento ku e punto di agènda, Epidemia di Coronavirus i su konsekuensianan pa Kòrsou
2. Petishon pa reunion públiko di Parlamento ku e punto di agènda, Lantamentu di un asina yama “grondbedrijf” en koperashon ku
Hulanda ku mester bai manehá terenonan ku ta propiedat di pais Kòrsou 

 

Willemstad, 3 di febrüari 2020

 

Na: Presidente di Parlamento
Señor W. Millerson
Wilhelminaplein 4
Presente

Tópiko: Petishon pa reunion públiko di Parlamento ku e punto di agènda, Lantamentu di un asina yama “grondbedrijf” en koperashon ku Hulanda ku mester bai manehá terenonan ku ta propiedat di pais Kòrsou

 

Señor Presidente,

 

Suskritonan, miembronan di e frakshon di Movementu Futuro Kòrsou (MFK) den Parlamento, ta aserka bo persona ku e petishon pa konforme artíkulo 64 Reglamento di Orden pa konvoká un reunion públiko ku e punto di agènda ariba menshoná.

 

Señor Presidente frakshon di MFK a tuma nota den prensa, ku durante di bishita di promé Minister na Hulanda a hiba kombersashon relashoná ku lantamentu di un “grondbedrijf” pa Kòrsou i ku Hulanda lo duna asistensia den esaki.

 

Frakshon di MFK a tuma nota tambe ku den e “groeiakkoord” firma ku gobiernu di Hulanda na artíkulo 8 insiso 6 ta menshoná lantamentu di e “grondbedrijf” aki.

Teniendo kuenta kon gabinete Rhuggenaath ta atendé ku patrimonionan di pueblo manera den kaso di benta di UTS i tambe di nos Refineria, ta lanta serka nos frakshon preokupashon pa ku lantamentu di e “grondbedrijf” aki.

 

Nos ta spera ku e struktura ku ta bai krea aki, lo no bai ta unu kaminda patrimonionan di pueblo di Kòrsou lo ser pone riba distansia for di gobiernu i ku ta un entidat semi-priva lo bai atendé ku nos propiedatnan.

 

Pa frakshon di MFK e motibunan relatá pa ku lantamentu di e “grondbedrijf” aki ta konstituí sufisiente motibu pa konvoká un reunion públiko di Parlamento ku e punto di agènda ariba menshoná, kual reunion Parlamento lo mester debatí ku Promé Minister i Minister di VVRP riba lantamentu di e “grondbedrijf” aki.

 

Nos ta pidi tambe pa gabinete Rhuggenaath pa mas pronto posibel pone tur dokumento relevante na disposishon di Parlamento, pa asina nos por hiba un debate na nivel.

 

Atentamente,

 

 

_____________                      _____________                      _______________

Gilmar Pisas                           Gilbert Doran                          Jacinta Constancia

 

---

 

Willemstad, 3 di febrüari 2020

 

Na: Presidente di Parlamento
Señor W. Millerson
Wilhelminaplein 4
Presente

Tópiko: Petishon pa reunion públiko di Parlamento ku e punto di agènda, Epidemia di Coronavirus i su konsekuensianan pa Kòrsou

 

Señor Presidente,

 

Suskritonan, miembronan di e frakshon di Movementu Futuro Kòrsou (MFK) den Parlamento, ta aserka bo persona ku e petishon pa konforme artíkulo 64 insiso 4 Reglamento di Orden pa konvoká un reunion públiko ku karakter di urgensia ku e punto di agènda ariba menshoná.

 

World Health Organization a dekretá un emergensia mundial relashoná ku e epidemia di Coronavirus. Nos por a skucha ekspertonan di GMN duna informashon riba e vírus aki i loke pa frakshon di MFK ta mas preokupante ta ku e ekspertonan aki a deklará ku no tin duda ku e vírus lo yega Kòrsou tambe.

 

Pa frakshon di MFK no ta sufisiente di tende ku hospital nobo tin sufisiente kamber kaminda por isolá personanan ku ser detektá ku e vírus aki. Nos kier skucha akshonnan mas konkreto di gobiernu i kua ta e medidanan ku lo tuma pa detektá i evitá ku e vírus aki no plama riba Kòrsou.

 

Mester hasi kontrolnan mas riguroso riba e vírus na entrada di nos aeropuerto i haf, tambe mester ta asina ku e empleadonan ku ta laborá na aeropuerto i haf ta dispone di e protekshon nesesario pa nan no wòrdu infekta.

 

Pa frakshon di MFK e motibunan relatá ta konstituí sufisiente motibu pa konvoká un reunion públiko di Parlamento ku e punto di agènda ariba menshoná, kual reunion Parlamento lo mester debatí ku Minister i GMN riba e akshonnan ku lo mester wòrdu implementá pa evitá i/òf minimalisá kualkier posibilidat pa e vírus aki yega Kòrsou.

 

Atentamente,

 

 

 

_____________                        _____________                          _______________

Gilmar Pisas                                    Gilbert Doran                                    Jacinta Constancia