Presentashon laboratorio di simulashon ‘Living Lab’ pa yega na solushonnan pa desaroyo di nos komunidat

Presentashon laboratorio di simulashon ‘Living Lab’ pa yega na solushonnan pa desaroyo di nos komunidat

Geplaatst op 06 February 2020 dor di Ministerio Asuntunan General i Promé Minister

WILLEMSTAD – Durante di un seshon hopi interesante na Universidat di Kòrsou Dr. Moises Da Costa Gomez (UoC), Promé Minister sr. Eugene Rhuggenaath, a risibí un presentashon amplio di e proyekto ‘Living Lab’ ku a introdusí durante 2019 na nos universidat. Ta trata aki di un proyekto a base di un kolaborashon intensivo entre Gobièrnu di Kòrsou, UoC i instituto di investigashon TNO (Toegepast-Natuurwetenschappelijk Onderzoek), pa yega na solushonnan duradero tokante prinsipalmente transishon di energía duradero, planifikashon di espasio urbano i mobilidat di nos poblashon.

Den e último lunanan ku a pasa, alrededor di 20 studiante di entre otro Fakultat di Siensia Tékniko a para ketu na diferente problemátika den e áreanan menshoná atraves di un sistema di simulashon asina yamá “Digital Twin’’; ohochi digital di Kòrsou. Ku e “Digital Twin” ta bira posibel pa investigá vários senario di simulashon i di e forma aki yega na posibel solushonnan optimal, inovativo i duradero ku por yuda den e proseso di traha maneho i finalmente tomo di desishon. Pa por hasi esaki, e studiantenan ta trahando estrechamente ku Ministerio di Tráfiko, Trasporte i Planifikashon Urbano, pero tambe a aserká diferente instansia tantu den Gobièrnu komo den sektor privá pa kolektá datonan.

E benefisionan pa ku e proyekto aki ta amplio, for di mehorá transporte públiko, krea oportunidatnan ekonómiko sostenibel, drecha kalidat di bida i inklushon sosial, te ku krea mihó kolaborashon entre Gobièrnu, sektor privá i akadémikonan, bin ku mas kupo di trabou i transferensia di konosementu. Banda di esei e proyekto di ‘Living Lab’ ta unu hopi spesial debí na e echo ku ta na algun parti di mundu, esta na Hulanda, Belgika, Singapur i awor na Kòrsou, tin un laboratorio di e estilo aki desaroyá.

Promé Minister Rhuggenaath a keda impreshoná di tur informashon ku el a risibí di e dosente i studiantenan di UoC tokante e proyekto i ta mira potensial grandi no solamente pa ku desaroyo di Kòrsou, pero pa ku desaroyo di nos kapital humano, en partikular nos hóbennan ku por traha mas ‘data-driven’ i por sigui desaroyá nan mes di forma profeshonal i personal. Esaki sea na Kòrsou mes i/òf atraves di programanan di interkambio den eksterior. Na final di e presentashon e studiantenan presente tambe a presentá nan proyekto di ‘Smart Agriculture’ ku ta un proyekto sostenibel dirigí riba kultivashon di fruta i bèrdura orgániko ku sistemanan moderno. Un proyekto ku ya pa fin di e aña aki mester keda realisá i ku tambe ta di gran relevansia pa e vishon di Gabinete Rhuggenaath.

Durante aña 2020 Gobièrnu di Kòrsou lo sigui risibí resultadonan konkreto di e proyekto ‘Living Lab’ ku lo trese mas oportunidat pa kontinuá i amplia e kolaborashon entre e partidonan envolví na benefisio di komunidat di Kòrsou, komo ‘Living Lab’ na kaminda pa ‘Smart Nation’.

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: