Gobierno di Aruba Contesta pa Parlamentario Marlon Sneek: GOBIERNO DI ARUBA A INVESTIGA ARUBA AIRLINES CORECTAMENTE

Gobierno di Aruba

 

Contesta pa Parlamentario Marlon Sneek:

GOBIERNO DI ARUBA A INVESTIGA ARUBA AIRLINES CORECTAMENTE

 

Relaciona cu acusacionnan contra Aruba Airlines den e programa di Nieuwsuur dia 7 di januari 2020, Parlamentario Marlon Sneek di AVP a haci preguntanan na Prome Minister Evelyn Wever-Croes. Parlamentario Sneek tawata kier sa e opinion di Gobierno di Aruba riba e acusacionnan aki contra Aruba Airlines y contra Gobierno di Aruba. Gobierno a contesta señor Sneek cu Gobierno ta tuma e acusacionnan aki hopi na serio.

 

Aunke cu Aruba Airlines di su banda a nenga categoricamente cu e acusacionnan aki ta berdad, Gobierno di Aruba toch a haci un investigacion mustrando e compania Aruba Airlines riba e importancia pa respeta e derechonan humano.

 

Riba e supuesto acusacionnan contra Gobierno di Aruba, Gobierno a contesta señor Sneek cu den e programa di television Hulandes no tawata tin acusacionnan den direccion di Gobierno. 

 

Parlamentario Sneek a puntra tambe pa haya un splicacion di e Corporate Structure di Aruba Airlines, dus con e compania ta hinca den otro. Gobierno a informa señor Sneek cu e compania aereo mester cumpli cu exigencianan di “Substantial Ownership” y “Effective Control”. Aruba Airlines tur momento mester por comproba cu mas di 70 % di e shares y e desicionnan cu ta wordo tuma, realmente ta den man di ciudadanonan di pais Aruba of companianan incorpora na Aruba. E oficina principal y operacionnan di e compania mester ta na Aruba. Den esaki, Gobierno di Aruba a indica cu Aruba Airlines ta cumpli cu e exigencianan aki den nos leynan. Pa demas informacion, a referi Parlmentario Sneek na Camara di Comerio di Aruba. 

 

Riba e pregunta di e Parlamentario si a haci excepcion riba ciere di frontera y a base di kico a haci e excepcion, Gobierno a contesta cu a base di e decreto di 10 di mei di 2019, den cua e prome ciere di e frontera a wordo anuncia cu despues a wordo cambia pa esun di 22 di mei 2019, a wordo prolonga un paar di biaha mas. Na e momento aki, e ciere di frontera ta valido te cu 10 di maart 2020.

 

E prohibicion di e transporte aereo entre Aruba y Venezuela ta existi keto bay pero cu cierto excepcionnan entre otro pa trece Arubanonan bek pa Aruba y hiba Venezolanonan cu ta pega na Aruba bek nan pais tanto boluntariamente of via deportacion. Esaki a wordo poni den e decreto di 22 di mei 2019 como number 1. Y a base di e decreto aki, e excepcionnan por wordo duna solamente door di e Director di Directie Luchtvaart. Ya caba el a ricibi 60 peticion cu ta basa riba e excepcionnan menciona den e decreto y tur a wordo honra desde e decreto di 22 di mei 2019.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: