Gritu pa prevenshon di parti difrakshon di MFK, relashoná ku e epidemia di Coronavirus
Gritu pa prevenshon di parti di frakshon di MFK, relashoná ku e epidemia di Coronavirus a haña oido serka CAP i nan a tuma medidanan pa prevení
Ku beneplásito suskrito Jacinta Constancia a tuma nota den prensa ku Curaçao Airport Partners (CAP) a duna oido na MFK su petishon pa tuma e medidanan apropiá tantu na aeropuerto i haf pa por detektá i prevení na tempu kualke posibilidat pa ku e epidemia di Coronavirus.
Ora gobiernu i e 12 Parlamentarionan ku ta sostené gobiernu a trata na krea e impreshon ku frakshon di MFK kier krea pániko bou di poblashon di Kòrsou, CAP a demonstrá ku ta nesesario pa tuma medidanan pa prevení kualkier eventualidat i pa protehé esnan ku ta laborá na aeropuerto.
Nos ta spera ku gobiernu ta realisá ku loke CAP ta hasiendo ta algu korekto, pa na promé lugá protehé e empleadonan di diferente sektor ku laborá na nos aeropuerto pa asina evitá ku e empleadonan aki tambe por wòrdu afektá. Na di dos lugá trata na evitá entrada di e epidemia aki via di aeropuerto.
CAP ta bai asina leu ku nan ta trahando riba un kamber na aeropuerto, pa si presentá kualkier situashon nan por isolá e persona òf personanan ku ta infektá mesora.
Frakshon di MFK ta felisitá CAP di a tuma e akshonnan korespondiente manera frakshon di MFK a indiká den nos karta na Minister Camelia-Römer fecha 31 di yanüari 2020, ta di mas bisa ku Prevení ta mihó ku Kura”
Nos ta spera ku Curaçao Port Authority (CPA), lo sigui e pasonan di CAP i tuma e medidanan apropiá na nos hafnan kaminda barkunan krusero ta yega, pa asina e personal ku ta laborá einan ta protehé.
Segun sifranan te ku awe tin 43.103 persona infektá i ya tin 1,018 persona ku a fayesé. Ta p’esei ta bon pa kada un di nos duna nos granito pa prevení i sigui instrukshon nan ku ta disponibel riba retnan sosial i internèt pa asina nos por tin un Kòrsou, Sano, Salu i Sigur.
Frakshon di MFK su meta ta prevenshon i protekshon di nos mes hendenan na promé lugá i ningun momento ta e intenshon pa krea pániko. Un pueblo informá ta un pueblo ku por prepará nan mes kontra di kualkier eventualidat.
Jacinta Constancia
Parlamentario pa Frakshon di
Movementu Futuro Kòrsou
