Desaroyo mará na e trayekto Plan di Fortifikashon Brantwer Kòrsou a keda presentá na e personal di Brantwer

Willemstad – Brantwer Kòrsou a tene un seshon di informashon importante pa tur miembronan di kuerpo di Brantwer, relashoná ku trayekto di fortifikashon ku ta den proseso aktualmente. Meta prinsipal di e trayekto aki ta pa sigui fortifiká kapasidat operashonal i duna oportunidat pa yega na un kuerpo mas profeshonal den nos komunidat. Durante e enkuentro, tim di maneho di Brantwer Kòrsou a kompartí detaye tokante e proseso ku ta andando. E trayekto di fortifikashon ta inkluí proposishon pa mehorá lei i reglanan, posishon huridikó, struktura di e organisashon, entrenamentu kontinuo pa bombero, plan di manego di komunikashon di manera ku por duna un miho servisio na komunidat.

Un parti esensial di e trayekto ta e enfoke riba desaroyo di kapital humano. Brantwer Kòrsou lo sigui ofresé mas oportunidat di entrenamentu, tantu lokal komo internashonal, pa trata na sigurá ku tur miembronan di e kuerpo ta keda aktualisá ku e téknikanan i proseduranan mas resien.

Durante e seshon, miembronan di Brantwer a haña oportunidat pa hasi pregunta i duna feedback tokante e kambionan proponé. E interakshon habrí i konstruktivo aki a mustra e kompromiso fuerte di tur partido pa traha huntu pa un Brantwer mas fuerte i resiliente.

Komandante di Brantwer Kòrsou interino, sra. Ana Rodriguez huntu ku e tim di manego a indiká ku e trayekto di fortifikashon no ta un proseso di un solo dia, sino un trayekto duradero ku ta pidi dedikashon i kompromiso di tur hende. “Nos ta konta riba e profeshonalismo i pashon di nos koleganan na Brantwer. Ku e sosten di Gobièrnu i e esfuerso di nos hendenan, nos ta sigur ku nos lo logra nos metanan,” el a indiká.

Otro aspekto importante di e trayekto ta mehorashon di komunikashon interno i eksterno. Dor di implementashon di un plan di komunikashon por duna un aporte i fortifiká e manera kon ta komuniká interno i eksterno.

Brantwer Kòrsou ta reafirmá su kompromiso pa sigui traha pa un organisashon moderno, fuerte i orientá riba servisio. E trayekto di fortifikashon ta un paso importante den e direkshon ei, ku meta final: protehá i duna kontribushon na protekshon di tur habitante di Kòrsou ku un grado haltu di profeshonalismo.

[FIN DI KOMUNIKADO]