Proyekshon positivo pa sektor turístiko den aña 2020

February 13, 2020 REDAKSHON

Proyekshon positivo pa sektor turístiko den aña 2020

Geplaatst op 13 February 2020 dor di Ministerio Desaroyo Ekonómiko

WILLEMSTAD- Aña 2019 tabata un aña sumamente positivo pa e sektor turístiko. Esaki a reflehá den e sifranan turístiko di 2019 ku a keda presentá pa sra. Giselle Mc William, minister di Desaroyo Ekonómiko huntu ku MEO i partnernan den e sektor turístiko manera Curaçao Tourist Board (CTB), Curaçao Hospitality & Tourism Assosiation (CHATA) i Curaçao Ports Autorithy (CPA). Basá riba plannan ku tin pa sigui invertí den e sektor tan importante aki durante 2020, tur kos ta pinta ku turismo lo sigui duna fruta.

Durante añanan tras di lomba ta indiskutibel ku e sektor turístiko tabata un di e pilarnan di mas importante den desaroyo di ekonomia di nos pais. E sektor aki a bin ta kontribuí positivamente na diferente kuponan di trabou, na un avanse den nos desaroyo sosioekonómiko i un boost na promoshon di nos kultura.
Periódikamente MEO, CTB, CHATA i tambe CPA ta bini huntu pa asina duna un bista kompletu riba e desaroyonan den e sektor turístiko di nos pais.
Durante e promé konferensia di prensa turístiko pa aña 2020, CTB a anunsiá ku un total di 463.685 turista di estadia a keda risibí na Kòrsou durante aña 2019. Esaki ta un subida di 7% kompará ku sifranan di aña 2018. Kòrsou su merkadonan prinsipal, esta Hulanda, Nort Amérika, Colombia, Alemania i Brasil a sòru pa 78% di e bishitantenan ku a keda risibí na 2019.

Pa 2020, CTB ta proyektá ku Kòrsou lo alkansá un total di riba 500 mil turista di estadia. Durante e aña aki lo kontinuá ku ehekushon di e kampaña ‘Feel it for Yourself’ den tur nos merkadonan prinsipal huntu ku programanan di training i tambe e programa di ouditoría di kalidat di empresanan ku ta duna servisio den e industria di turismo. Tambe lo kontinuá durante 2020 ku e programa di konsientisashon ‘Kòrsou ta Dushi’. Sifranan preliminar di CTB pa luna di yanüari 2020 ta indiká ku turismo di estadia a krese ku 3% kompará ku e mesun luna aki na 2019. Den esaki, merkado Estadounidense a registrá un kresementu di 26%.

Kompará ku aña 2019 CHATA na su turno ta raportá ku den 2019 prestashon hotelero na Kòrsou no tabatin muchu kambio. De fakto, e averahe di okupashon di hotèl den 2019 tabata 71.1%, kual ta un bahada chikitu di 0.5 punto di porsentahe kompará ku 2018. Pa loke ta trata e tarifa promedio diario (ADR) i tambe e entrada pa kamber disponibel(REVPAR), ámbos a registrá un oumento na aña 2019. Kòrsou su ADR a subi di $152,64 na aña 2018 pa $158,51 den 2019 kual ta nifiká un oumento di 3.8% miéntras ku nos RevPAR a oumentá di $ 110,87 pa $114,67 kual ta indiká un oumentu di 3.4% CHATA ta optimista pa ku e diferente desaroyonan den e sektor. Den 2020 e meta ta, pa sigui invertí den krea demanda i tambe konekshon di buelonan pa asina aportá na mas kresementu turístiko.

Pa loke ta trata turismo krusero, tabatin un total di 313 barku krusero ku a bishita Kòrsou durante 2019. Esaki tabata un oumento di 5.4% kompará ku barkunan krusero ku a bishita nos isla durante 2018. Ku e kantidat di barku krusero aki, un total di 809.874 a pisa suelanan di Kòrsou kual a resultá den un oumento di 6.5% den kantidat di turista krusero kompará ku 2018. Pa aña 2020 CPA ta proyektá un bahada leve den kantidat di turistanan krusero. Un di e faktornan den esaki lo ta un kambio den itinerario di Monarch durante e periodo di zomer benidero. Ta spera ku pa luna di òktober 2020 e barku Monarch lo kontinuá su itinerario kustumbrá den área di Sur Amérika.

MEO na su turno tambe ta proyektá ku e diferente avansenan den e sektor a logra generá un total di 2.2 bion florin pa Kòrsou durante aña 2019. Esaki, ta representá un subida di 5,6% kompará ku aña 2018. A base di esaki, MEO ta proyektá ku den 2019 sektor di turismo den su totalidat a kontribuí positivamente na ekonomia di Kòrsou.