Proyekto: deshasí di shushi grátis na lèntfel Malpais i transbordo Koraal Specht

Selikor NV ta anunsiá konforme e proyekto di Minsiterio di Salubridat,
Medioambiente i Naturalesa, ku tur usuario di tantu lèntfel Malpais i transbordo
Koraal Specht por depositá nan shushi grátis durante 2 luna. Esaki ta nifiká ku
Selikor lo no kobra ò fakturá e usuario. Durante e periodo akí Ministerio di
Salubridat, Medioambiente i Naturalesa lo kubri e gastunan i rekompensá Selikor
pa e pérdida di e entradanan akí.
Selikor NV ta rekordá tur usuario di lèntfel i transbordo ku tur otro kondishon pa
por depositá shushi ta keda vigente durante e temporada aki tambe. E usuario
mester por identifiká su mes ku un indentifikashon bálido i e vehíkulo mester
disponé di un karchi di kùr bálido. Na transbordo Koraal Specht por depositá te
un máksimo di 2m³ di shushi pa vehíkulo, esakinan mester ta bon paketá na
bulto, den kaha òf saku. Pa hasi uso di tur otro servisio e usuario mester akudí
na lèntfel Malpais pa deshasí di su shushi.
Orarionan di servisio na lèntfel Malpais ta di djaluna pa djadumingu di 7or di
mainta pa 7or di anochi i orario di transbordo Koraal Specht ta di djaluna pa
djadumingu di 8or di mainta pa 4or di atardi. E orarionan akí ta bálido te ku
próksimo aviso.
E periodo di e proyekto akí a inisiá djamars 3 di sèptèmber i ta terminá djaweps
31 di òktober 2024.
Selikor NV ta enkurashá tur usuario di hasi uso di e oportunidat brindá pa hasi
uso di e 2 lokalidatnan legal; lèntfel Malpais i transbordo na Koraal Specht pa
deshasí di bo shushi.