Kòrsou meresé di un Teater Nashonal i no por laga e ruina di Sentro Pro Arte permanesé den e estado ku e ta

Willemstad, 13 di febrüari 2020

 

Presidente di Parlamento di Kòrsou

Señor W. Millerson

Wilhelminaplein # 4

PRESENTE

 

Señor Millerson,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di OWCS, señor Eugene Rhuggenaath.

 

Danki pa e koperashon.

 

Atentamente,

 

Gilbert Doran

Parlamentario

pa frakshon di MFK

 


 

Minister di OWCS

Señor E. Rhuggenaath
PRESENTE

Kòrsou, 13 di febrüari 2020


Tópiko: Kòrsou meresé di un Teater Nashonal i no por laga e ruina di Sentro Pro Arte permanesé den e estado ku e ta

 

Señor Minister Rhuggenaath,

 

Na aña 2002 gobiernu di turno a tuma e desishon di sera nos teater nashonal Sentro Pro Arte, esaki debí na retraso den mantenshon di e teater aki i despues ku awa a yena den e sotano di e edifisio i tabata difísil pa gobiernu di e tempu ei solushoná e problema aki.

 

For di 2002 te awor na aña 2020, un total di 18 aña e edifisio aki a keda pará sin ku a hasi nada kuné i e edifisio a sigui deteriorá, adiktonan di droga a poderá di e edifisio i a konvertí esaki den nan kas. Un bèrgwensa kon gobièrnunan di turno no a sa di tuma ningun akshon konkreto pa ku e edifisio aki.

 

Kalkulashon a wòrdu hasi pa por a kuminsá ku e proseso di renobashon di nos teater nashonal. E renobashon aki lo a kosta alrededor di 13.7 mion florin. Pero lastimá ku dia13 di sèptèmber, di aña 2016 a drenta notisia ku e edifisio di Sentro Pro Arte ta na kandela i esaki a kima por kompleto.

 

Kuater (4) aña a transkurí i e edifisio ku a kima por kompleto ta para einan sin ku nada ta sosodé i por konsiderá ku ta un ruina tin para na Schouwburgweg, karga ku masha hopi sushedat ku por kontribuí na malesa di esnan ku ta laborá den e area aki.

 

Pa e motibunan ariba menshoná, frakshon di MFK ta aserka Minister di OWCS, konforme artíkulo 96 di reglamentu di Orden, ku e siguiente preguntanan relashoná ku nos teater nashonal Sentro Pro Arte;

 

  1. Kua ta e motibu ku no a hasi ningun esfuerso konkreto pa renobá i/òf konstruí un teater nashonal pa Kòrsou?

 

  1. Minister por informá Parlamento dikon te ainda no a basha e e edifisio aki abou?

 

  1. Gabinete Rhuggenaath tin un plan konkreto pa Kòrsou por haña bek un teater nashonal di e índole di Sentro Pro Arte?

 

  1. Gabinete Rhuggenaath a saka sèn pa skapa kompanianan priva, dikon no tin espasio pa konstrukshon di un teater nashonal?

 

  1. Si kultura i arte ta importante pa gabinete Rhuggenaath, ta dikon gabinete Rhuggenaath te awe no a hasi nada konkreto pa demonstrá esaki?

 

  1. Minister tin un plan konkreto pa loke ta trata kultura i arte inkluyendo un teater nashonal, Parlamento por haña un kopia di e plan aki? 

 

Nos ta spera kontesta di Minister Rhuggenaath den un término korto, pa pueblo di Kòrsou por sa ki dia nan por dispone di un teater nashonal. 

 

Atentamente,

      

 

Gilbert Doran

Parlamentario

pa frakshon di MFK

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: