Kantidat di mortonan den tráfiko ta rekerí análisis profeshonal

Kantidat di mortonan den tráfiko ta rekerí análisis profeshonal

 

Den 2019 tabata tin 17 morto den aksidente di kua mas ku mitar di e kantidat aki a tuma lugá riba Helmin Magno Wiels Boulevard.

E kantidat aki ta di tal índole ku mester hasi un estudio pa wak ta kiko ta kousa di e aksidentenan ku a kondusí na e kantidat di mortonan aki.

Nos tabata asombrá pa tende minister di hustisia bisa den un reunion públiko dia 17 di febrüari último ku den tur e kasonan ku a okurí riba Helmin Magno Wiels Boulevard tabata trata di velosidat haltu.

En bèrdat ta asina ku mundialmente ta menshoná ku velosidat haltu ta na promé lugá komo kousa di aksidentenan den tráfiko. Indirektamente ta indiká ku  ta falta di e shofùr.

Esaki no ta un echo ku nos mester akseptá sin mas. 

Miéntras komportashon humano ta tuma tempu pa bo kambia pa medio di konsientisashon, por influensiá komportashon den tráfiko al instante dor di trese sierto kambionan na e infrastruktura.

Ekspertonan di tráfiko ta di opinion mester stòp di kulpa e shofùr pa velosidat haltu i introdusí  medidanan di seguridat riba e kareteranan segun estudionan ta indiká. Un bòrchi indikando velosidat máksimo no tur ora ta sufisiente pa tin un tráfiko sigur pa motibu ku esaki ta dependé pa un gran parti di komportashon di e outomobilista 

Ta tarea di minister di Tráfiko, Transporte i Planifikashon Urbano pa sòru pa kareteranan sigur. Esaki ta enserá tambe pa tin un outoridat di tráfiko pa studia aspektonan di  komportashon di usuarionan di nos infrastruktura. Ku esaki por trese kambionan na e karetera òf por ehèmpel kusinchi, vangrail òf plantashon di palunan kantu di kaminda ku ta influensiá komportashon di e usuarionan mes ora.

Di e manera aki lo por redusí e kantidat di aksidentenan i konsekuentemente e kantidat di mortonan den tráfiko.

 

A base di e ariba menshoná e frakshon di Movementu Progresivo ta hasi e siguiente preguntanan na minister Jesus-Leito:

  1. E ministerio di Tráfiko Transporte i Planifikashon Urbano tin ekspertonan pa ouditoria nos infrastruktura?
  2. Kuantu di e ekspertonan aki e ministerio tin?
  3. E ekspertonan aki ta sertifiká?
  4. Minister a laga hasi un estudio riba e kantidat di mortonan ku a tuma lugá den tráfiko den 2019?
  5. Kiko ta e resultado di e ouditorio aki?
  6. Minister a laga hasi un estudio riba Helmin Magno Wiels Boulevard kaminda tabata tin mas ku 50 por shento di e total di mortonan den tráfiko?
  7. Kiko ta e kambionan ku ekspertonan a sugerí pa trese pa di tal manera hasi e tráfiko riba e Boulevard aki mas sigur?
  8. Ki dia lo trese e kambionan aki pa asina hasi e tráfiko riba e karetera aki mas safe?

 

Movementu Progresivo

Marilyn Moses

This site uses Akismet to reduce spam. Learn how your comment data is processed.

error: Content is protected !!
%d bloggers like this: