Rekargo riba preis pa garantisa suministro di kombusitbel

Rekargo riba preis pa garantisa suministro di kombusitbel

Geplaatst op 27 February 2020 dor di Ministerio Desaroyo Ekonómiko

WILLEMSTAD- Entrante 3 di mart próksimo Gobièrnu lo inkorporá temporalmente e promé faseta di un rekargo den e kálkulo di preis di kombustibel. E rekargo aki ta sirbi pa garantisá suministro di kombustibel na Kòrsou mientras ta warda pa e refineria bira operashonal.

Pa algún luna kaba, e último operadó di refineria no tabata prosesá krudo i esaki a kondusí ku nos planta di refiná tabata para ketu. Na momentu ku e refineria tabata aktivo, tabata eksistí un dil entre Refineria Isla i Curaçao Refinery Utilities (CRU). Den e dil aki CRU tabata risibí kombustibel serka Refineria Isla i a kambio Refineria Isla tabata risibí koriente, stom, airu i awa desaliná. E dil entre Refineria Isla i CRU no ta na vigor mas, i e kombustibel nesesario pa CRU por keda funshoná, mester keda importá dor di Curoil pa asina por garantisá suministro regular i funshonamentu normal di Kòrsou. 

 

Importashon di produktonan petrolero dor di Curoil pa CRU na su turno ta nifiká ku gastunan di e kompania tambe a oumentá. Pa por kubri e èkstra gastunan pa mantené CRU operashonal i sigurá suministro regular di kombustibel pa komunidat, ta nesesario introdusí un rekargo riba preis di produktonan petrolero pa konsumo lokal. Gobièrnu su ròl den esaki ta, pa supervisá di moda ku tur aktor/kompania anónimo di Gobièrnu por funshoná di akuerdo ku Good Corporate Governance, esta funshoná independientemente sin ku e kompania ta keda imponé pa aktua segun e manera ku Gobièrnu ke. Den e ròl aki, Gobièrnu a sinta na mesa tantu ku RdK komo Curoil pa asina yega na un solushon ku lo afektá e saku di e komunidat lo mínimo posibel.

E rekargo aki ta nifiká un subida den preisnan petrolero kual lo keda repartí den un periodo di kuater (4) aña pa asina aliviá e efekto riba saku di komunidat. Si no a repartí esaki den 4 aña, e subida lo tabata di mas òf ménos 19 sèn. Introdukshon di e rekargo aki a keda repartí den 2 faseta di kual e promé faseta ta drenta na vigor entrante djamars 3 di mart próksimo. Pa e konsumidó esaki ta enserá ku tantu gasolin komo diesel lo subi ku 2.3 sèn pa liter, bòm di gas (grandi) di 100lbs lo subi ku Fls. 2,50 i bòm di gas (chikí) di 20lbs lo subi ku 50 sèn.

Promé ku introdukshon di e rekargo aki, Gobièrnu a risibí konseho di Bureau Telecommunicatie, Post & Utilities (BTP&U) komo e instansha lokal responsabel pa rekalkulashon periódiko di entre otro preisnan di produkto petrolero. Basá riba esaki i teniendo kuenta ku e situashon ekonómiko di nos pais, Gobièrnu a hasi tur loke ta na su alkanse pa minimalisá e efektonan pa pueblo di Kòrsou. Esaki, dor di entre otro repartí e rekargo den un periodo di 4 aña. Aparte di esaki, Gobièrnu ta hasiendo lo máksimo pa mas pronto posibel Klesch por kuminsa operá loke tambe lo yuda minimalisá efektonan pa nos komunidat. E di dos faseta di e rekargo ta planeá pa drenta na vigor entrante aprel 2020. Por resultá ku e di dos faseta aki lo no tin efekto direkto riba nos komunidat ya ku esaki ta dependé di preisnan di kombustibel internashonal, pero lo anunsiá komunidat debidamente di e dessaroyo aki.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: