Ministerio GMN ku resultado konkreto despues di a bishitá kongreso di salú na New Delhi, India i workshop di salú na Den Haag, Hulanda.

Ministerio GMN ku resultado konkreto despues di a bishitá kongreso di salú na New Delhi, India i workshop di salú na Den Haag, Hulanda.

Willemstad, 3 mart 2020 – Manera anunsiá den un komunikado di prensa di 14 di februari 2020 Minister di Salú, Medio Ambiente i Naturalesa (GMN) riba invitashon di Ministerio di Ayush di India huntu ku Organisashon Mundial di Salú ‘OMS’ a partisipá  na un kongreso ministerial tokante e sistema di kodifikashon mundial di malesa, “International Conference on Standarisation of Diagnosis and Terminologies in Ayurveda, Unani and Siddha Systems of Medicine (ICoSDiTAUS), dianan 25 i 26 di febrüari 2020 na New Delhi, India.  

E delegashon di Minister di GMN a konsistí di e Sekretario General, drs. S.Melfor, i e Inspektor General di Salú a.i., prof. dr. S.Keli. OMS ta siguí pone énfasis riba e balor di inkluí Medisina Tradishonal (MT) komo parti di e kuido di salú i ta suprayá e balor pa strukurá esaki den e systema di kuido di salú di pais. Manera konosí den e Akuerdo di Gobernashon i e Programa di Gobernashon di Kòrsou 2017-2021 i e Dokumento di Vishon Transishon di Kuido 2020 – 2025 a skohé pa desaroyá Medisina Tradishonal, Komplementario i Integrativo, komo parti di e vishon di Wellness. E kongreso tabatin 4 seshon intensivo di kua Minister Camelia-Römer a presidí e seshon kual ta trata relevansia i regulashon di Medisina Tradishonal den sistemanan di salú. Tambe Minister Camelia-Römer a duna un presentashon di e maneho di Kòrsou enkuanto e tópiko aki riba menshoná. Komo resultado e ministernan a bai di akuerdo ku un Deklarashon ku ta suprayá e balor di Medisina Tradishonal, Komplementario i Integrativo. Durante e kongreso e paísnan presente a ekspresa gran elogio pa e manera al kaso i efektivo ku Korsou ta atende e tajekto di Medisina Tradishonal, Komplementario i Integrativo.

Tambe e delegashon a tene un enkuentro ku:

  • National Institution for Transforming India, konosí komo NITI Aayog, e thinktank di promé minister Modi, representá pa e Direktor dr. V.K. Paul; 
  • Ministerio di Ayurveda, Yoga & Naturopathy, Unani, Siddha, Sowa-Rigpa i Homoeopahty, yamá, “AYUSH”, ku ta e ministerio enkargá ku desaroyo di medisina Tradishonal i Natural, representá pa e sekretario general Vaidya Rajesh Kotecha;
  • All Indian Institute of Ayurveda, un hospital anekso na un hospital ayurvédiko, representá pa sra. prof. Tanuja Nesari. 

Komo resultado di e konferensia ministerial i e bishita di trabou di e delegashon di Kòrsou a logra ku India ta dispuesto pa sera un Memorandum of Understanding (MoU) 

 

ku Kòrsou, komo base pa koleborashon riba diferente tereno manera entre otro: desaroyo di medisina natural integrativo; kolaborashon den área di produkshon i komersio; programanan akadémiko i investigashon sientífiko; sentronan di wellness i salú; i otro áreanan ku partidonan deseá. E inteshon ta, pa despues di atendé e proposishon den Konseho di Minister pa siguí enkaminá e trayekto di kolaborashon i duna kontenido na e MoU. 

Ta importante pa informá ku e gobièrnu di India ta dispuesto pa finansia un gran parti di e puntonan di koperashon menshoná den e MOU.

 

Riba invitashon di Embahada di India na Den Haag e delegashon a partisipá dia 28 di febrüari 2020 na un workshop titulá “Mainstreaming Ayurveda in the Netherlands and Europe” na den Haag, kaminda e Emabhador di India a invitá Minister di Salú, Medio Ambiente i Naturalesa, sra. Camelia-Römer, pa duna un presentashon di e maneho di Kòrsou enkuanto Medisina Tradishonal, Komplementario i Integrativo den e sistema di salú di Kòrsou. Konklushon di partisipantenan tabata ku Kòrsou por sirbí komo modelo pa Hulanda i Europa pa maneho i implementashon di  Medisina Tradishonal i Natural.

Finalmente ta bon pa menshoná ku gobièrnu di India lo rembursá, esta paga un gran parti di e gastu di e biahe. 

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: