Imani Trinidad a haña nòmber ofishal

Imani Trinidad a haña nòmber ofishal

 

Korte Komun di Hustisia, riba 5 di mart 2020 a disidí na fabor di Imani Trinidad. Despues di un lucha, mayornan di Imani por selebrá e echo ku ofisialmente e nòmber di Imani ta bai keda registrá riba e akta di nasementu sin bida. 

 

Imani a nase sin bida na aña 2015 i riba su akta di nasementu sin bida el a haña e nòmber “levenloos”. Mayornan van Wilgen-Trinidad na 2019 a kuminsá kana e trayektoria pa trese kambio den esaki. Sabiendo ku tin mas baby sin nòmber i ku kada akshon lo ta pa e baby nan aki tambe.

 

13 sèptèmber 2019 e mayornan a hasi un petishon na Korte Komun di Hustisia pa kambia e akta i rekonosé e nòmber di Imani Van Wilgen. Dia 6 di di febrüari e kaso a bai dilanti i awe 5 di mart 2020 nan a risibí e notisia positivo ku e akta ta bai keda kambiá pa mustra Imani su nòmber. Esaki ta nifiká ademas ku tur otro mayor ku ta den mesun situashon por hasi uso di e veredikto aki komo hurisprudensia i tambe pidi pa rekonosé e nòmber di nan yunan ku a nase sin bida.

 

Mayornan di Imani ta gradisí un i tur persona pa e sosten ku nan a risibí durante e periodo aki. I ta indiká ku nan lo sigui traha, pasombra esaki ta un stap, pera ainda falta diferente kambio den lei. Entre otro ku un tata por rekonosé su yu ku nase sin bida. 

 

Pa tur mayor ku ta interesá pa sa mas tokante e kambio aki, mayornan Van Wilgen-Trinidad ta informá ku nan lo organisá un seshon di informashon i tambe nan lo kompartí tur informashon riba media sosial. 

   

____________________________________________________________

Farièle  i Dominic van Wilgen-Trinidad 

This site uses Akismet to reduce spam. Learn how your comment data is processed.

error: Content is protected !!
%d bloggers like this: