No por kibra heru ku man……… Lantamentu di ‘Bureau Integriteit’ ta pegá pa falta di espasio finansiero

No por kibra heru ku man……… Lantamentu di ‘Bureau Integriteit’ ta pegá pa falta di espasio finansiero

Geplaatst op 12 March 2020 dor di Ministerio Maneho di Gobernashon, Planifikashon i Servisio Públiko

Willemstad – Un di e palabrashonnan den akuerdo di gobernashon riba kua Gabinete Rhuggenaath ta basá ta lantamentu di un ‘Bureau Integriteit’ ku mester forma parti di e ministerio di Gobernashon, Planifikashon i Servisio (GPS). Esaki no a keda realisá ainda i ta un situashon ku algun persona ta kue tene pa trata na hasi daño na imágen di Gabinete Rhuggenaath. Minister Armin Konket komo esun ku ta karga responsabilidat polítiko pa realisashon di e palabrashon aki den akuerdo di gobernashon ta defendé reputashon di Gabinete Rhuggenaath riba e punto aki.

Kon a kuminsá kana?

Minister Konket a tuma e punto aki di e akuerdo di gobernashon masha na serio. Prueba di esei ta e echo ku ya riba 5 di yüni 2017, apénas 6 dia despues ku Gabinete Rhuggenaath a sinta, el a sinta na mesa ku algun konsehero pa kuminsá papia di e proseso pa yega na e ‘Bureau Integriteit’. Un siguiente paso tabata pa lanta un grupo di trabou ku a haña komo enkargo pa hasi tur preparashon nesesario pa ku lantamentu di e büró. E grupo di trabou aki a kuminsá traha na òktober di 2017 i a kaba ku su trabou na mart di 2018 hasiendo entrega di un relato final i e siguiente produktonan:

–        Konsepto di e ‘Landsverordening Bureau Integriteit’;

–        Plan kon strukturá e büró;

–        Konsepto di “instellingsbesluit” konteniendo entre otro e presupuesto di mas aña.

E Rapòrt a keda someté na huisio di Konseho di Minister i a keda aprobá.

A dal den muraya di limitashonnan finansiero …….

E siguiente paso, promé ku lo a aserká Raad van Advies i Parlamento, tabata di aserká ministerio di Finansa pa chèk si e gastunan relashoná ku e büró por keda akomodá den presupuesto di 2018 i e añanan ku ta sigui. Lantamentu di e unidat di integridat ta un inisiativa di Gabinete Rhuggenaath ku kua lógikamente no a tene kuenta anteriormente den presupuesto.

Ministerio di Finansa, na mas ku un okashon, te hasta despues ku Konseho di Minister a duna instrukshon pa pone fondo disponibel, a mantené e posishon ku presupuesto di Gobièrnu simplemente no tin espasio pa por aloká fondo adishonal pa ‘Bureau Integriteit’. Ministerio di Finansa a keda mustra riba e echo ku e situashon finansiero ta hustamente pidi pa baha gastunan di Gobièrnu i no oumentá. Pues ounke Konseho di Minister a pidi pa pone fondo disponibel, esaki no por a keda honrá debí na e situashon finansiero malu.

Kiko awor pa ku lantamentu di ‘Bureau Integriteit’?

Minister Konket ta di opinion ku e a hasi tur loke e por a hasi pa yega na e ‘Bureau Integriteit’. E lei i tur dokumento relevante ta trahá i aprobá pa Konseho di Minister.  Minister Konket a bati na múltiple  okashon na porta di Konseho di Minister i na porta di Ministerio di Finansa pa logra ku e trayekto por sigui kana, pero sin resultado.

Minister Konket ta di opinion tambe ku si un palabrashon hasí den e akuerdo di gobernashon ta resultá di no ta realisabel pasó situashon di presupuesto no ta permití, anto ta oportuno pa aserká partidonan ku ta forma koalishon pa evaluá e palabrashon aki. Asina por disidí komo koalishon ku sea ta skrap e palabrashon òf ta skrap otro aktividat ku koalishon ta haña ménos importante i aloká e fondo ku ta bini liber pa finansiá ‘Bureau Integriteit’.

Pero, no ta para ketu ku trabounan riba área di integridat….

No ta asina tampoko ku ta para ketu. Minister Konket ta konsiente ku mester duna atenshon kontinuo na importansia di integridat. E rekrutashon di e persona ku lo mester fungi komo direktor di ‘Bureau Integriteit’ ta keda konkluí. Solamente e lo no tin un organisashon na su disposishon, pero e lo haña e tarea pa kordiná tur aktividat den kuadro di promoshon di integridat den e aparato di gobièrnu. Por pensa riba entre mas kos e trayekto di formulashon di un maneho integral pa ku e tema di integridat i kampañanan di konsientisashon.

This site uses Akismet to reduce spam. Learn how your comment data is processed.

error: Content is protected !!
%d bloggers like this: