MINISTER MADURO: TIN SUFICIENTE ALIMENTO Y COMBUSTIBEL NA ARUBA No mester tin motibo pa panico

MINISTER MADURO: TIN SUFICIENTE ALIMENTO Y COMBUSTIBEL NA ARUBA

No mester tin motibo pa panico

 

ORANJESTAD – Durante conferencia di prensa Minister di Economia asesora pa Directora di Departamento Economico  y sr. Hubert Dirks den representacion di Mayoristanan (Wholesalers), a pidi comunidad pa keda trankil y no bay over den panico door di bay haci compra na grandi pa miedo di e consecuencia cu e crisis di COVID-19 por trece pa nos Pais.

 

Tin suficiente alimento, fruta, berdura y productonan petrolero

Minister Maduro a informa cu Departamento di Economia ta den contacto cu e mayoristanan y nan a confirma cu nan tin suficiente stock di alimento pa abastece e mercado local y pesey no mester bay den panico y bay cumpra tur locual tin riba reki den supermercadonan. Tin suficiente stock y tin container na caminda cu mas stock. Pa locual ta trata fruta y berdura, esakinan ta yega Aruba tur siman pues tambe tin suficiente. Minister Maduro a informa cu tin suficiente combustibel y gas, pues pueblo no mester preocupa pa esey.

 

Mayoristanan tin un plan di contingencia

E mandatario a splica cu na momento cu tin un crisis, ta monitorea e situacion ‘dia pa dia, ya cu den un dia e situacion por cambia. Di parti di e mayoristanan sr. Hubert Dirks a splica cu nan tin un plan di contingencia pa si acaso algo sosode cu e mercado caminda nan ta importa e productonan, den e caso aki for di Merca. Na momento cu algo pasa nan por divergi y bay importa for di otro mercado cu ta mas cerca di nos Pais.

 

Ban convivi cu otro pa hunto nos por logra sobrevivi

Minister Maduro a haci un apelacion riba e sentido di responsabilidad y convivencia di comunidad. E mandatario a pidi pa nos cuida nos mes y di otro, specialmente di esnan cu ta mas vulnerabel. Ban brinda nos ayudo na otro pa asina nos tur hunto por surpasa e crisis aki. Gobierno hunto cu un crisisteam ta trahando duro pa percura pa tur decision y accion necesario. Hunto y cu poder di Dios nos ta logra surpasa e crisis aki.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: