Prome Minister Evelyn Wever-Croes: DISTANCIAMENTO SOCIAL: ‘STOP DI PLAM’E’!
Prome Minister Evelyn Wever-Croes:
DISTANCIAMENTO SOCIAL: ‘STOP DI PLAM’E’!
Hopi hende ainda despues cu Aruba a wordo confronta cu dos caso di Corona Virus, no ta tumando e situacion cu nos ta den mucho na serio. “E comportacion di cada ciudadano di pais Aruba mester cambia si nos kier bringa e virus aki of pa e no plama mas y pa nos sali exitoso di esaki”, Prome Minister Evelyn Wever-Croes a enfatisa.
Mundo henter a cuminsa practica ‘Social Distancing’, un distanciamento social. Evita encuentronan di grupo grandi di hende sea na luganan social of na trabou. No bay caminda tin aglomeracion di hende of fiesta di famia of di club unda tin hopi hende.
Gobierno ya caba a emiti un prohibicion pa actividadnan publico, actividadnan social, cultural y Deportivo. Sinembargo e fin di siman tras di lomba a mustra nos cu e comportacion no a cambia.
Si nos tuma como ehempel Spaña, 3 siman pasa e pais aki tawata tin apenas 4 caso di Corona Virus. Ya pa diasabra 5200 caso a wordo raporta y diadomingo casi 8000 caso a wordo raporta. Esaki ta un indicacion di con lihe e virus aki ta plama.
“P’esey nos mester di cooperacion di cada ciudadano di pais Aruba pa cambia su comportacion y no bay den aglomeracionnan. Esaki no ta momentonan pa fiesta den grupo grandi. Pa nos para y bringa e virus aki nos mester di abo. Gobierno ta haciendo su parti, pero cada ciudadano mester tambe haci di su parti pa asina hunto nos vence”, Prome Minister Evelyn Wever-Croes a duna di conoce.
