Pa PIN: Krisis ta oportunidat pa inová

Pa PIN: Krisis ta oportunidat pa inová

 

Willemstad — Kòrsou, manera rònt mundu ta bibando momentunan di krisis komo konsekuensha di e menasa di Corona virus. Nos gobièrnu ta tumando e medidanan nesesario pa kontené e riesgo. Na mes momentu gobièrnu a anunsiá e promé pakete di alivio pa evitá pèrdèmentu di kupo di trabou i tambe ofresé sosten sosial na suidadanonan.

 

PIN sinembargo ta mira oportunidat durante e krisis aki pa nos para ketu i deskubrí oportunidatnan pa kambionan   fundamental i inovativo den tur aspekto di nos sosiedat. PIN ta mira komo un fundeshi importante kambionan fundamental den nos sistema di enseñansa. Teknologia i kreatividat mester remplasá e sistema di enseñansa aktual i prepará futuro generashonnan pa e mundu ku a kambia permanente. 

 

Banda di esei nos struktura ekonómiko mester bira unu di diversidat. Nos mester mira produkshon di kalidat di mas tantu produktonan di promé nesesidat komo énfoke di nos ekonomia, stimulando asina eksportashon tambe. Den e kuadro aki ta importante pa hasi mas i mihó uzo di teknologia, p.e. dor di komersio digital ku sistemanan di risibi pedido i hasi pago digital.  

 

PIN próksimamente di akuerdo ku su manifesto lo bai entamá un konsulta riba e tópiko di inovashon den diferente bario di Kòrsou. Pa ehèmpel, lo krea sekshon di bario den un forma hopi inovativo kaminda nos lo huza teknología komo plataforma pa por interkambiá  riba e tema aki ku henter nos komunidat di Kòrsou. Di e forma aki lo elimina e miedu di usa teknología pa hasi negoshi. Kòrsou lo bira un ehempel pa mundu kaminda a logra kambia e efektonan di un pandemia den oportunidat. Inovashon ta e solushon!

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: