Servisionan di ADC na komunidat no ta kore peliger. Un trahadó di ADC a tèst positivo pa Covid-19

Servisionan di ADC na komunidat no ta kore peliger.

Un trahadó di ADC a tèst positivo pa Covid-19

WILLEMSTAD — Laboratorio nashonal ADC den su kalidat komo dunadó di trabou ta
konfirmá ku ela keda ofisialmente informá dor di e tim di Dr. I. Gerstenbluth di G&Gz
djarason atardi lat ku un di su trahadónan a tèst positivo pa e vírùs di Corona (Covid-19).
Ta trata di un trahadó ku den su funshon no tin kontakto direkto ku pashènt òf ku públiko
general ku ta bishitá ADC i/òf su sentronan di prek. ADC ta enfatisá ku manera ela keda
informá komo dunadó di trabou di e resultado di e tèst, mesora a tuma tur akshon
nesesario i segun su protokòl interno éstrikto i tambe segun instrukshonnan di G&Gz pa
prevení òf kontené Covid-19. ADC na mes momentu ke enfatisá ku tur su operashonnan
komo Laboratorio nashonal a tuma lugá i ta sigui tuma lugá konforme e normanan di
kalidat haltu ku ADC mester kumpli kuné. Meskos ta konta pa tur e servisionan di ADC na
komunidat. Pues, e proseso i servisionan di laboratorio no a kore peliger na niun
momento i ta kontinuá.

Protokòl interno

Pa loke ta trata e trahadó ku a tèst positivo ADC a konstatá ku ela sigui e instrukshonnan
manera duna pa nos gobiernu en konekshon ku prevenshon i maneho di eventual kaso di
Covid-19. Asina ku e trahadó involví a sinti síntomanan di ferkout òf grip, tosamentu I eventual
keintura, ela (1) keda kas djaluna, (2) tuma kontakto ku su dòkter di kas i (3) na momentu ku e
sintomanan a bira mas indikativo e tim di G&Gz a keda di mèldu dor di su dòkter di kas.
Durante djamars e tim di G&Gz a konkluí ku e kaso ta kuadra ku e profil di posibel kasonan di
Covid-19 i djarason profeshonalnan di G&Gz a bai efektua e tèst na kas di e trahadó. Djarason
atardi lat e resultado a bira konosí i G&Gz a informá tantu e trahadó komo ADC komo dunandó
di trabou di esaki. Abase di esaki ADC, den estrecho kolaborashon ku G&Gz, a tuma entre mas
e sigiente pasonan: (1) a manda un total di nuebe (9) trahadó ku tabatin kontakto direkto ku e
kolega den karentena pa 14 dia. (2) A hasi un limpiesa desinfektante rigoroso den e área
kaminda e kolega en kuestion ta laborá. (3) Awe mainta ADC a informá su personal via un
informe interno di e kaso. Esaki ta nifiká ku e siguridat i bienestar di tur trahadó i di tur kliente ta
keda tumá na kuenta. ADC ke enfatisá ku a tuma e akshonan ariba menshoná komo medida di
prekoushon.

Manera e epidemiólogo di ministerio di Salubridat dr. Izzy Gerstenbluth a indiká awe durante
rueda di prensa di gobièrnu di Kòrsou tokante desaroyonan di Covid-19, ta konsiderá e kaso akí
unu ‘importá’, pues ku e kontagio ta relashoná ku regreso resien for di eksterior di e persona en
kuestion mes òf di un hende yegá na dje ku lo a peg’é ku e vírùs. E tim di dr. Izzy Gerstenbluth
segun protokòl ta efektuá meskos ku tur otro kaso un “contacten-onderzoek” mas amplio. G&Gz
lo sigui monitoriá e situashon di e trahadó akí ku ta isolá i esun di e nuebe trahadónan ku ta den
karentena, mientras ADC ta biba den konbibensia ku nan.

Kalidat, siguridat i bienestar

ADC ta bolbe enfatisá ku tur e operashonnan di ADC a tuma lugá i ta sigui tuma lugá konforme
e normanan di kalidat haltu ku ADC mester kumpli kuné. Pues, e kuido di laboratorio no a kore
peliger na niun momento i komunidat por sigui konta ku e servisionan di kalidat haltu di ADC.
Willemstad – 26 di márt 2020

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: