Komunikado: Artista i músikonan mester haña guia i sosten fiskal

Efektonan di corona vírùs a asotá mundu kompletu i paralisá vários sektor ku ta di vital importansia pa desaroyo i kresementu ekonómiko di kualke pais. Kòrsou no ta un eksepshon.

Ta di aploudí ku e kantidat di personanan infektá ta relativamente abou te

na momentunan aki, danki na medidanan elokuente ku gobièrnu a implementá pa mitigá traspaso di e vírùs. Esaki ta enserá ku por ehèmpel e sektor di horeca mester a posponé òf modifiká nan sistema di operashon diario i konsekuentemente esaki ta afektá tur empresa ku direktamente òf indirektamente ta dependé di e sektor di horeca.

Por ehèmpel artista i músikonan sigur ta un di e gruponan mas afektá debí ku lógikamente nan labor ta pa entretené na diferente lokalidatnan di horeca. Den e situashon aktual di corona vírùs, bou di ningun sirkunstansia ta permití aglomerashon di hende pues artista i músikonan no por hasi nan trabou i konsekuentemente nan ta sin

entrada.

Na su turno gobièrnu di Kòrsou a introdusí diferente pakete di solidaridat ku ta duna oportunidat na diferente empresa i personanan pa apliká pa un sosten o alivio finansiero pa un periodo di tres luna. Natural esaki ta konta pa tur ku nan empresa o negoshi ta registrá legalmente i ta asumiendo nan responsabilidatnan fiskal. No ta un

sekreto ku gran mayoria di no solamente músikonan, pero tambe e pintor, bailarina, rèper, aktor di komedia pa menshoná algun, no ta hasi deklarashon esta “aangifte” di nan labornan.

I esaki ta debí na diferente faktor. Entre otro e echo ku gobièrnu nan di turno a hasi poko esfuerso pa informá e grupo aki tokante nan derechi i responsabilidatnan fiskal, i tambe a hasi poko esfuerso pa transformá e sektor aki den un industria formal.

Otro faktor tambe ta ku mayoria artista ta desaroyá nan talento i elevá esaki te na un nivel ku nan por asta biba for di dje, pero pa falta di bon guia fiskal, ta sigui ku e kultura di traha “pretu” den e sektor di entretenimentu aki.