Detenshon relashoná ku instigamentu, menasa i insulto.

KOMUNIKADO DI PRENSA 147 / 2020

11 aprel 2020

Detenshon relashoná ku instigamentu, menasa i insulto.

Relashoná ku un kaso di instigamentu, menasa i insulto kontra di Minister Presidente di Kòrsou, djasabra 11 di aprel 2020 alrededor di 11’or, polis a detené un persona. Resientemente un dama a publiká potrèt di Minister President di Kòrsou riba ret sosial, kombiná ku un teksto den kua e ta menasá e minister ku morto, instigá e pueblo kontra di e minister i insultá esaki.
Kontinuando ku e investigashon aki, a detené den oranan di awe mainta e dama sospechoso E.S.O. di 29 aña di edat nase na Kòrsou.
E detenshon a tuma lugá den Kanga.
Durante di e detenshon a tene tambe un entrada hudisial na e kas aki, unda a konfiská artíkulonan ku ta di importansia pa e investigashon.
A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.

Kuerpo Polisial ke bolbe atvertí komunidat ku tur hende tin e libertat di ekspreshon pero semper bai ku e respèt nesesario i sin instigamentu, menasa o insulto.
E tres echonan aki ta kastigabel pa lei i polis lo aktua severamente kontra di esnan ku ta hasi nan mes kulpabel na esakinan.