” Pakete alivio ” na Empresanan chiki i mediano

Willemstad, 4 di aprel 2020 – Korpodeko i Qredits ta uni pa reforsá e sosten brindá na komunidat di empresanan chikí i mediano (Small and Medium-sized Entreprises, SMEs), pa aliviá e efektonan di e pandemia COVID-19.

 

Korpodeko ta reiterá su kompromiso pa sostené e komunidat empresarial i ekonomia di Kòrsou den su totalidat. Despues di a implementá Pakete di Alivio I, ku ta konsistí di un periodo di grasia di 60 dia pa su klientenan, awor Korpodeko i Qredits a sera kabes pa reforsá e sosten brindá na empresanan chikí  i mediano ku ta enfrentando konsekuensianan di e pandemia COVID-19. Algun di e klientenan di Korpodeko ya a hasi uso di e Pakete di Alivio I, i tin kaso kaminda Korpodeko a aprobá un periodo di grasia mas largu ku 60 dia. Komo parti di Pakete di Alivio I, tambe Korpodeko a amplia e fasilidat pa duna konseho na klientenan, pa di e manera aki asistí i guia nan mas mihó posibel pa sali for di e krísis inesperá aki. Implementashon di e seshonnan di duna konseho aki lo tuma lugá na momentu ku e Toke de Keda instituí pa gobièrnu di Kòrsou keda kanselá.

 

Miéntras ku Qredits i Korpodeko kada unu lo hasi nan mes proseso de Krédito, Korpodeko, Qredits i MEO lo traha ku e plataforma di MI Negoshi di MEO pa prosesá asina petishonnan ku drenta.

 

Pakete di Alivio II

Aparte di ofresé Pakete di Alivio I na su klientenan, Korpodeko a hasi un revishon ekstenso di su rekursonan i ta ofresé e disposishon pa amplia e sosten duná na kompanianan chikí  i mediano den e momentonan ekonómiko desafiante aki. Segun su kapasidat Korpodeko a determiná ku lo por pone un total di 1 mion florin na disposishon di su klientenan pa medio di Pakete di Alivio II. Pa ku esaki Korpodeko a entregá un proposishon na gobièrnu ku ta konsistí entre otro di e siguiente puntonan: 

• Pakete di Alivio II ta aplikabel pa kompanianan eksistente ku ta operashonal pa por lo ménos 12 luna; 
• E finansiamentu ta destiná pa yuda pa kontrarestá e kaida temporal entre produkshon di entrada i kolekshon di entrada i gastunan fiho di e empresa; 
• Fasilidat di fiansa na empresanan chikí i mediano kualifiká na un interes di 2%; 
• Periodo di grasia di máksimo 12 luna basa riba evaluashon individual; 
• Tur ekstenshon di fiansa ta bai kompañá ku konseho aktivo i partisipante koordiná via MiNegoshi di MEO.  

 

Basá riba kombersashon i den estrecho kolaborashon ku e tim di MEO, tambe Korpodeko i Qredits, MEO lo buska Advisors’ pa por forma un tim kualifiká ku por kana e proseso di implementashon, kòntròl i ‘coaching’ di empresanan pa ku e Pakete di Alivio II. 

 

E empresanan ku tin nesesidat pa apliká pa e Pakete di Alivio II mester hasi e aplikashon aki via di MiNegosh.org di MEO 

 

Korpodeko ta keda pendiente di e medidanan ku gobièrnu lo tuma i paketenan di solidaridat ku lo ofresé, pa kaba di formalisá Pakete di Alivio II pa su klientenan. Di e manera aki huntu ku Qredits, Korpodeko ta hasi su máksimo esfuerso pa ta di sosten pa nos mundu empresarial i asina mitigá e sla ekonómiko kousá pa COVID-19. Korpodeko ta hasi un apelashon na tur su klientenan pa keda pendiente di su medionan di komunikashon pa keda na altura di tur desaroyonan.