DISERTASHON PROMÉ TANDA RIBA LEI DI MARIHUANA 

DISERTASHON PROMÉ TANDA RIBA LEI DI MARIHUANA 

 

Señor presidente, felis dia na esnan ku ta sigui e reunion aki, p’abo persona, na koleganan, na señora minister i su konseheronan. Señor presidente, mi kier gradisí señora minister, ku a sa na kontesta preguntanan hasi na su persona. 

 

Den mesun rosea, mi ta gradisí señora minister, ku pa trata na konvensé parlamento, pa duna sosten na e kambio di lei aki, te hasta a manda dokumentonan, ku ta pa uso di dòkternan i botikarionan. Señor presidente, mi ta laga e brochura di informashon, pa mi koleganan i alabes dòkternan, señora Mozes i señor Schoop.

 

  1. ANÁLISIS IMPAKTO MACRO-EKONOMIK DI MEO: 

Señor presidente mi a lesa, ku hopi atenshon e análisis makro ekonómiko, di e industria di mariwana medisanal pa Kòrsou. Esaki emití, pa MEO na luna di novèmber 2019. E análisis hasi aki, ta promé ku e pandemia COVID-19. 

Señor presidente si gobièrnu i parlamento, bai tras di e dokumentu no firma aki di MEO, presupuesto di gobièrnu ta salba i Kòrsou no tin problema finansiero i tampoko problema di trabou mas. 

 

Señor presidente, esaki pa e siguiente motibunan. Por fabor, pone atenshon señor presidente: invershon inisial, 147 mion florin total, siguiente 2 añanan invershon di 36.8 mion florin, eksportashon di e mariwana lo produsí 317 mion florin i 872 mion pa aña, 1.2 mion florin na pèrmit, gobièrnu lo haña 285.8 mion florin na entrada di belasting, na divisa lo generá entre 3 mion i 5.9 mion florin anual i lo krea 8900 direkto i/o direkto kuponan di trabou. 

 

Señor presidente, kla nos ta, tur problema ta solushoná, no mester bai pidi Hulanda niun sèn i no mester bin niun medida mas riba pueblo. Nos a skapa, pasobra dor di planta, kultivá i eksportá mariwana, mariwana medisinal, tur problema solushoná. 

Señor presidente, mi a lanta for di mi stul, stòp di lesa e dokumentu no firmá aki, pa wak si ta bèrdat e kosnan, ku mi ta lesa aki ta. Señor presidente, si e tabata firma pa un persona, ku ta responsabel pa e dokumentu aki, mi por a keré. 

 

Señor presidente nos mester kuminsá bira serio den e pais aki. Ministerionan mester stòp di pone kos riba papel, ku ni esun mes ku a pone no ta kere den dje. Talbes, p’esei e no ta firmá? 

 

Señor presidente, gobièrnu a tuma nota, ku a base di importashon, e reserva di divisa ta mengua na aña 2020, ku 54 mion florin, na aña 2021, ku 51 mion florin i na aña 2022, ku 176 mion florin(wak tabèl 3). 

 

PREGUNTA: 

 

  • Señor presidente, kua ekonomista òf ta ken ta responsabel, pa e dokumentu sin firma di MEO aki?
  • Señor presidente, e análisis hasí a keda igual na e periodo despues di COVID-19?
  • Señor presidente, gobièrnu ta kere den e 3 tabèlnan presentá riba página 4?

 

  • Señor presidente, minister di finansa a tuma nota di e tabèlnan presentá?
  • Señor presidente S.E.R., RVA I BANKO SENTRAL DI KORSOU I ST. MAARTEN a duna komentario/konseho riba e 3 tabèlnan.?
  • Señor presidente, dikon ke duna un boost na e sektor agrario dor stimulá planta mariwana na lugá di planta kuminda, pa pueblo kome(página 1)
  • Señor presidente, a base di e COVID -19, ku ta ku desaroyonan internashonal, relashoná ku e industria di industria di mariwana medisinal(página 1)?
  • Señor presidente kon ta pará, ku e merkado internashonal, relashoná ku e industria di industria di mariwana medisinal (página 1)?
  • Señor presidente, na unda gobièrnu a indiká, e terenonan pa produsí e mariwana medisinal (página 1)?

 

Señor presidente, nos frakshon, esta frakshon di MFK kier klaridat riba e pregunta aki, debí ku terenonan pa planta na Kòrsou, tur ta destiná pa Agrikultura. Papiando di Agrikultura señor presidente, ta bon pa gobièrnu informá parlamento kuantu petishon tin den espera pa tereno pa planta i señor presidente no ta étiko ku bo un kantidat di kunukero riba lista di espera pa risibí un pida tereno pa planta i ta pasa nan dilanti i otorgá tereno pa proyektonan ku nos no tin sigur, siguiendo desaroyonan mundial i internashonal riba e tema di Mariwana den su totalidat.

 

PREGUNTA:

 

  • Kuantu petishon tin pa ku tereno pa agrikultura ?
  • Kua ta e áreanan ku Gobièrnu tin destiná pa agrikultura ?
  • Kuantu tereno tin destiná aktualmente 
  1. MANEHO INSPEKSHON DI SALUBRIDAT TOKANTE REMIDINAN PAKETÁ NO REGISTRÁ: 

 

Señor presidente, mi a tuma nota di e 12 puntonan di e maneho ariba menshoná! Pero señor presidente, mi no sa ku mi mester konfia òf kere, pa motibu ku e no ta firma dor di niun persona.

 

PREGUNTA:

 

  • Ki òf kua relashon, e supuesto maneho aki tin relashoná ku e konsepto kambio di lei aki. – Ken ta e aktual inspektor di remedi? 

 

  1. MEMORIE VAN ANTWOORD(FRAKSHON MFK PAGINA 39-48: 

 

Señor presidente, gobièrnu a kontesta di lo start un kampana di informashon via di e ministerio di Asuntunan General. Tambe ku via di e radio-emisoranan mas popular di Kòrsou lo emití i distribuí komunikadonan.

 

PREGUNTA:

 

For di dia 8 aprel 2020 i te hasta awe, dos siman despues, ku ta dia 23 di aprel di aña 2020, no tin informashon tokante di e lei di mariwana. Nos frakshon ta pidi gobièrnu pa dia informashon kuminsá, ku esaki ta pasa na tur medio di komunikashon. Gobièrnu NO mester diskriminá na momentu di duna informashon. 

  • Señor presidente, dikon gobièrnu NO a kumpli, ku su promesa den su kontestanan na Staten?

 

Tokante kontròl i personal pa hasi esaki, minister ta kontesta, ku OM ta kontrolá pafó so di e lokal físiko di e mariwana medisinal. Paden di e lokal físiko di e mariwana medisinal, kontròl ta na enkargo di e botikario i BMCC! 

 

PREGUNTA:

 

  • Señor presidente, ta di akuerdo ku mi, ku OM mester por kontrolá paden i pafó di e lokal físiko di e mariwana medisinal? 

 

Señor presidente, mi a mira Filipina menshoná den e paisnan, ku Kòrsou ke bai eksportá mariwana. Presidente di Filipina, señor Rodrigo Duterte, ta un abogado meskos ku presentadónan di lei aki, ministernan abogado, Camelia-Romer i Girigorie! E diferensia entre nan ta, ku unu ta bringa tur loke ta droga i dos ta bringa pa legalisá mariwana.

 

PREGUNTA: 

 

  • Señor presidente, señora minister no ta na altura di e maneho di presidente señor Rodrigo Duterte, relashoná ku negoshi di droga na Filipina? 
  • Apesar di esaki, tòg minister ta laga Filipina den e rei di paisnan, pa hasi negoshi di mariwana? 
  • Señor presidente, nos frakshon a hasi pregunta na gobièrnu, pa haña sa ta kua ta e pais(nan) den Caribe, ku a legalisá mariwana. Minister ta kontesta nos frakshon, pa bai wak página 31 di memorie van antwoord. A base di esaki nos ta bolbe hasi e mesun pregunta i nos ke haña nòmber di e pais(nan), ku a legalisá mariwana. 

 

PREGUNTA:  

 

  • Señor presidente, kua ta e pais(nan),den Caribe ku a legalisá mariwana?
  • Señor presidente, otro pregunta ku gobièrnu no a kontesta, ta esun di kua estudio gobièrnu a hasi, pa presentá e lei aki. Aki tambe minister a referí nos pa bai wak página 31 di e memorie van antwoord. A base di esaki nos ta bolbe hasi e mesun pregunta i nos frakshon, ke tende ta kua estudio gobièrnu mes a hasi!

 

 

PREGUNTA:

 

  • Señor presidente, kua ta e estudio(nan) ku gobièrnu a realisá, pa presentá e proyekto di lei di mariwana aki? 

 

Señor presidente, frakshon di MFK a pidi 14 konseho i/o punto di bista di diferente departamento i organisashon (página 42-48 MvA). Na lugá di manda esakinan, gobièrnu ta bin splika yen di asuntu si manda e konsehonan. Entre otro, ku a invitá ministerio públiko pa partisipá den tim di trayekto pero nan NO a presentá, ku a kombersá ku dòkternan individual, a kombersá ku un organisashon di e koperativa di e kunukeronan i ku domeinbeheer. Señor presidente, e historia konta aki ta masha bunita pero nos frakshon a pidi nan konseho! A base di esaki nos ta bolbe hasi mesun petishon. E bia aki si nos ke risibí nan, inkluso esun di finansa i esun di DWJZ! 

 

PETISHON:

 

Frakshon di MFK, ke risibí, konseho i punto di bista di; BUR.DOM, MEO, CINNEX, FMA, MINISTERIO  PUBLIKO I otronan menshon riba página 42-48 di e Memorie van Antwoord.

 

  • Ku kua dòkter gobièrnu a papia, ku dòkter Schoop? 
  • Ku kua di e 2 koperativanan di kunukero gobièrnu a papia?
  • Nos frakshon, frakshon di MFK señor presidente, sinseramente ta lamentá e komparashon hasí parti di gobièrnu entre mariwana medisinal versus morfina i codeina! Señor presidente manera bo sa, MORFINA ta un trankilisante i hopi bia ta uz’é pa pashènt, ku tin kanser i/òf, ku a haña ataka di kurason. CODEÏNA, ta silensiaa tosamentu i e ta un otro trankilisante tambe. E ta wòrdu usa ku paracetamol.
  • Na mi humilde opinion señor presidente, señora minister no tabata nesesario kompará i hasi doló na un grupo den nos komunidat. Esaki djis pa hustifiká e regulashon di mariwana! 

 

UN OPSERVASHON: 

 

Nos frakshon ta pidi gobièrnu, pa por fabor no hasi tipo di insinuashonnan asina. E ta hasi hopi doló serka hopi pashènt ku mester di e medikamentu nan aki pa nan salú. 5 Riba preguntanan di MFK, kuantu entrada hudisial i kuantu persona tin aktualmente detené, minister ta kontesta, ku pa motibu tékniko i falta di tèmpo no tabata por kontesta e 2 preguntanan hasi. Frakshon di MFK por tin komprenshon pa e problema tékniko pero nos ta rechasá ku ta pa motibu di tempu. Nos no ta aseptá esakinan. A base di esaki, nos ta bolbe hasi mesun 2 preguntanan i ta spera, ku awor si tin tempu i ku no tin niun problema tékniko! 

 

PREGUNTA:

 

  • Den periodo entre yanüari aña 2017 i febrüari aña 2020, kuantu entrada hudisial i kuantu persona a ser detené, pa motibu di a kultivá mariwana? 
  • Kuantu e preis di simia ta aktualmente riba merkado?
  • Kuantu supsidio FMA ta haña aktualmente, for di kua pòst di presupuesto i for di kua ministerio?
  • Kuantu e gastunan operashonal di BMCC lo ta? 
  • Riba pregunta di frakshon di MFK, ta kon gobièrnu a yega na e konklushon, ku industria mariwana medisinal ta un negoshi floresiente riba tereno internashonal, nos frakshon ta haña un kontesta arogante i sin rèspèt pa miembronan di parlamento. A base di esaki, frakshon di MFK, ta bolbe hasi e mesun pregunta. E bia aki si nos ke haña e kontesta sin mester manda nos bai buska “elders” den e MvA. 

 

PREGUNTA:

 

  • A base di kiko, gobièrnu a yega na e konklushon menshoná den MvT, ku e industria di mariwana medisinal ta internashonal un negoshi floresiente? 
  • Kua ta e ròl(nan) di minister di GMN, durante i despues ku e kambio di e lei proponé aki drenta na vigor? E kontesta di minister no ta konvisente i minister no a kontestá e pregunta hasi. (página 45-48 MvA). 
  • Frakshon di MFK kier haña e struktura di organisashon di BMCC(página 46-48 MvA) 
  • A hòrta vürwèrk na Kas di Pòlbu i 600 kilo di kokaina a somentá, den warda di reshèrshi. 
  • Kua garantia minister por duna parlamento, ku e mariwana produsí i wardá tambe no ta wòrdu hòrtá for di mangasinanan? 
  • Kuponan di trabou. Gobièrnu ta bisa di krea entre (400-700, MvT) i MEO ta bisa 8900 (den e dokumentu no firmá, página 3), kasi mes tantu, ku Guandong Zehnron! 
  • Kuantu trabou e legalisamentu di mariwana medisinal aki, ta bai krea porfin? 6 Señor presidente, direpente a surgi trabou, pa esnan ku nivel di enseñansa abou. Esaki no tabata menshoná anteriormente, den e proposishon di e kambio di lei presentá. Ta estudionan HBO i WO(universitario) so tabata menshoná, ku lo a haña trabou. Esaki ta un punto positivo. Preshon di nos parti tòg tin bia ta yuda i tene kuenta kuné.
  • Kua trabou (por fabor spesifiká) esakinan ta bai okupá den e industria di mariwana medisinal aki?
  • Riba MFK su pregunta, kon pagonan di kliente na BMCC ta bai tuma lugá, gobièrnu a kontesta, ku esaki ta bai tuma lugá ku instrumentonan bankario!
  • Kon gobièrnu ta mira esaki tuma lugá?
  • Kon ta si bankonan, rechasá e pagonan aki meskos ku di riferonan?
  • Gobièrnu a tene kuenta ku leinan kontra labamentu di plaka?

 

Sr. presidente komo miembro di parlamento pa frakshon di MFK mi ta keda te aki pa loke ta pregunta i remarke nan hasi riba tratamentu di e lei di marihuana aki i danki tambe na tur esnan ku a skucha.

 

Juniël Carolina

Miembro di Parlamento pa frakshon di MFK

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: