Karta PAR: Resolushon di Parlamento Europeo pa instituí un fondo eksepshonal pa Pais i teritorionan Ultramar.

Na: Minister di Asuntunan General
Sr. Eugene Rhuggenaath

Fort Amsterdam # 17

Presente

Kòrsou, 23 aprel 2020

 

Tópiko: Resolushon di Parlamento Europeo pa instituí un fondo eksepshonal pa Pais i teritorionan Ultramar.

 

Apresiabel Promé Minister Rhuggenaath,

 

For di luna di desèmber 2019 mundu kompleto a konfrontá e pandemia di COVID-19. Kòrsou no ta diferente for di mundu i na inisio di aña 2020, Kòrsou tambe a keda konfrontá ku e corona vírus. Esaki a hiba ku Kòrsou a tuma diferente medida pa mitigá e kontagio i salbaguardiá salú i bida di nos siudadanonan.  

 

Konsekuensia negativo di e diferente medidanan ku a keda introdusí ta un kaida drástiko den forsa ekonómiko di nos komunidat. Esaki na su lugá a hiba na problemanan sosial serio, entre otro desempleo, violensia doméstiko i eskases di rekurso finansiero. Rekuperashon di nos Pais ta bai rekerí inyekshon finansiero supstansial i frakshon di PAR ta konsiente ku e finansa di Kòrsou ta limitá.

 

Resientemente Frakshon di PAR a tuma nota ku Parlamento Europeo a aseptá un resolushon pa Komishon Europeo inisiá un fondo eksepshonal di sosten finansiero pa Pais i Teritorionan Ultramar.  Segun e resolushon medionan finansiero lo mester keda aloká pa asistí e teritorio i paisnan ultramar. Paisnan i Teritorio Ultramar ta meresé a sosten full den tempu di krísis, segun Parlamento Europeo. 21 di aprel último miembro di Tweede Kamer, sra. Diertens a dirigí pregunta na minister di Hustisia di Reino, na Minister di Asuntunan Interno i di Reino i Ministernan di Asuntunan di Eksterior, referente e fondo di sosten aki i e akshonnan ku a keda tumá.

 

Den kuadro di e resolushon ku a keda aseptá den Parlamento Europeo siguiente preguntanan: 

 

1. Minister Presidènt Rhuggenaath a tuma nota di e resolushon di Parlamento Europeo pa aloká medionan finansiero den un fondo eksepshonal di sosten pa Pais i Teritorionan Ultramar?
2. Minister Presidènt Rhuggenaath por informá Parlamento si den kuadro di e fondo eksepshonal aki i mirando e urgensia di e situashon ekonómiko– sosial di Kòrsou,  tabatin kontakto ku Ministernan di Reino?  
3. Minister Presidènt Rhuggenaath por fasilitá Parlamento informashon, si Konseho di Minister di Reino Hulandes ta dispuesto pa hasi un petishon na nòmber di Kòrsou, na e fondo aki? 

 

1. Minister Presidènt Rhuggenaath lo ta dispuesto pa entregá un petishon na e fondo di sosten di Union Europeo. Un petishon similar na e petishon ku Kòrsou a hasi na Konseho di Minister di Reino Statuto, artíkulo 36 di Statuto? 

Di antemano mi ta gradesí promé minister Rhuggenaath pa e kontestanan. 

 

Atentamente,

 

Ana Maria Pauletta

Miembro di Parlamento Partido Alternativa Real